Kópshilik asyǵa kútip, tamashalaityn "Túngi stýdiia" baǵdarlamasyn kim júrgizetini belgili boldy, dep habarlaidy Ult.kz tilshisi. Bul týraly Qazaqstan telekorporatsiiasynyń basshysy Erlan Qarin Ulttyq arnanyń kóktemgi televiziialyq tanystyrylymynda aitty.
Endi Nurlan Qoianbaevtyń ornyna bul baǵdarlamany belgili syqaqshy Qairat Ádilgerei júrgizedi. Aita keteiik, Qairat Ádilgerei "Bazar joq" alańy men "Ázil álemi" jobalaryna qatysqan. Sonymen qatar, ol buǵan deiin "Senbilik shoý" baǵdarlamasynda júrgizýshi bolyp, Nurlan Qoianbaev, Aidos Sarym men Jandarbek Bulǵaqovpen jumys istegen edi.
"Biz 1 naýryzda ashylatyn jańa maýsymǵa belsendi túrde daiyndalyp jatyrmyz. Birneshe baǵdarlama jańartylǵan formatta shyǵatyn bolady. Onyń ishinde "Túngi stýdiia" baǵdarlamasy bar, onda endi basqa júrgizýshi bolady. Nurlan Qoianbaev óziniń shyǵarmashylyq jobalarymen ainalysýdy sheshti. Bul máseleni 2017 jyldyń jazynda - Nurlan Qoianbaevtyń televidenie salasynan biraz ýaqytqa ketkisi kelgende talqylaǵan bolatynbyz. Sonda biz Nurlannyń osy jobany jyldyń sońyna deiin júrgizetinin sheshken edik. Oǵan osy úshin alǵys aitqym keledi. Endi "Túngi stýdiia" jańa formatta shyǵatyn bolady", - degen edi Erlan Qarin.
Al, burynǵy júrgizýshi Nurlan Qoianbaev biraz ýaqytqa shyǵarmashylyq demalysqa ketti. Bul týraly ol óziniń instagram jelisindegi paraqshasyna:
"Bul óz sheshimim. Televiziiada úzilis jasadym. 16 jyl istedim, barlyq jaqta tolyqqandy shtatta istedim. Kóptegen baǵdarlama men serial túsirdim. Sosyn bir ýaqytta úzilis alý kerek ekenin túsindim. Qazir bospyn. Árine, birden usynystar túsip jatyr, bizde naryq shaǵyn ǵoi. Usynystar bar, biraq ázirshe qabyldaýǵa asyqpaimyn. Televiziiada kóp ýaqyt jumys istedim, áldenemen shuǵyldansam, sońyna deiin baramyn. Sondyqtan maǵan óte aýyr. Qazir shyǵarmashylyq demalystamyn", - dep jazdy.
