Elimizde 25 tamyzdan bastap «Quqyqtyq tártip» jedel aldyn alý sharasy bastaldy. Osyǵan qarai keshe túnde buqaralyq aqparat quraldarynyń ókilderi politsiia qyzmetkerlerimen birge qalanyń sol jaǵalaýyndaǵy kóńil kóterý oryndaryn aralap shyqty, dep habarlaidy QazAqparat.
Túngi saǵat 10-00-de kezekshilikke shyqqan qyzmetkerlerge naqty nusqaýlyqtar bergennen keiin tilshilermen suhbattasqan Nur-Sultan qalasy Esil aýdandyq politsiia basqarmasynyń bastyǵy, politsiia podpolkovnigi Madiiar Aitýǵanov reid barysynda qoǵamdyq oryndar, dámhana, meiramhana syndy kóńil kóterý nysandary tekseriletindigin aitty.
«Ishki ister ministriniń nusqaýlyǵyna sáikes, tamyzdyń 25-29 aralyǵynda «Quqyqtyq tártip» jedel aldyn alý sharasy bastaldy. Osyǵan orai Nur-Sultan qalalyq Politsiia departamenti Ulttyq ulan jasaqtarymen birigip jáne qoǵamdastyq ókilderin jumyldyra otyryp, elordada is-sharalardy qolǵa aldy. Basty maqsat - jedel ahýaldy saýyqtyrý, quqyqbuzýshylyq pen qylmystyń aldyn alý, jol júrisi tártibin qatań saqtaý jáne karantin talaptarynyń saqtalýyn qamtamasyz etý», - dedi Madiiar Aitýǵanov.
Karantin talaptary jeńildetilgenimen túngi saǵat 11-00-de qalada barlyq dámhanalar, meiramhanalar, barlar jabylýy tiis. Sondyqtan BAQ ókilderi týra saǵat 11-00-de Esil aýdandyq politsiia basqarmasynyń ǵimaratynan túngi reidke attandy. Aldymen at basyn tiregen oryn Turan dańǵyly boiyndaǵy «Astanalyq saiabaqtyń» shetinde ornalasqan qonaqúidegi kóńil kóterý nysany boldy. Politsiia qyzmetkerleri kelgende ashyq daladaǵy dámhanada otyrǵan jastardyń qarasy qalyń edi. Alaida olar kamera arqalaǵan jýrnalister men politsiia qyzmetkerlerin kórgennen keiin tez arada jinalyp, taraýǵa májbúr boldy. Al meiramhana ishi bos bolǵanymen úsh vip-zalynda týǵan kún toilaǵan jastar ustaldy. Saýran kóshesi boiyndaǵy barlardyń birinde de dál osyndai jaǵdai boldy. Bul barda da jastar emin-erkin kalian shegip, kóńil kóterip otyrdy.
Politsiia qyzmetkerleri eki nysanda da jastarǵa koronavirýs indeti áli joiylmaǵandyǵyn, onyń taralý qaýpi áli de joǵary bolyp turǵandyǵyn túsindirip, aiyppul saldy. Atalǵan oryndardyń basshylary da aiyppul arqalady.
Aita keterligi, karantindik rejimi men sanitarlyq-epidemiologiialyq talaptardy buzǵany úshin jeke tulǵalarǵa 30 ailyq eseptik kórsetkish (1 AEK - 2778 teńge / 30 AEK - 83 340 teńge), al kásipkerlik sýbektilerine 230 AEK-ten (638 940 teńge) joǵary somaǵa aiyppul salynady.
