Tailand astanasy Bangkokta ornalasqan Rong Beer Na Ladprao mýzykalyq bary men túngi klýbynda bolǵan joiqyn órtten qaza tapqandar sany 30 adamǵa jetti. Sonymen qatar, 70-ten astam adam túrli dárejedegi kúiik pen tútinge ýlaný saldarynan aýrýhanalarǵa jetkizilgen. Zardap shekkenderdiń birazy aýyr halde jatyr, dep habarlaidy ult.kz.
Qaiǵyly oqiǵa tún ortasyna taiaý bolǵan. Kýágerlerdiń aitýynsha, aldymen ǵimarattyń ishinde jarylysqa uqsas dybys estilip, artynsha jalyn óte jyldam taralǵan. Birneshe minýttyń ishinde qoiý tútin búkil ǵimaratty basyp, kelýshiler jappai syrtqa umtylǵan.
Aldyn ala tergeý málimetinshe, órttiń shyǵýyna konditsioner júiesindegi elektr symdarynyń qysqa tuiyqtalýy sebep bolýy múmkin. Sonymen qatar, politsiia ǵimarattaǵy qaýipsizdik talaptarynyń saqtalmaǵanyn tekserip jatyr. Tergeýshilerdiń málimetinshe, keibir evakýatsiialyq esikterdiń jabyq nemese bógelip turǵany, al ishki árleýde tez janatyn materialdardyń qoldanylǵany adamdardyń der kezinde syrtqa shyǵýyna kedergi keltirgen bolýy yqtimal.
Qutqarýshylardyń aitýynsha, kóptegen adamnyń máiiti terezesi joq dárethanalardan tabylǵan. Mamandar olardyń qoiý tútinniń kesirinen shyǵa almai qalǵanyn aitady. Órt kezinde ǵimarattyń ishinde júzden astam adam bolǵan.
Bangkok gýbernatory qaladaǵy barlyq oiyn-saýyq oryndarynda órt qaýipsizdigine qatysty jappai tekseris júrgiziletinin málimdedi. Bilik ókilderi qaýipsizdik normalaryn buzǵandarǵa qatysty qatań shara qoldanylatynyn aityp, qaiǵyly oqiǵaǵa kináli tulǵalardy anyqtaý úshin arnaiy tergeý bastalǵanyn habarlady.
Bul órt sońǵy 17 jyldaǵy Bangkoktaǵy eń iri ári adam shyǵyny kóp túngi klýbtaǵy apattardyń biri retinde baǵalanyp otyr. Oqiǵa Tailandtaǵy oiyn-saýyq oryndarynyń qaýipsizdik talaptaryna qatysty máselelerdi qaitadan kún tártibine shyǵardy.
