«Tumar» ulttyq televiziialyq báigesi jalyndy tulǵalar men tyń bastamalardyń jasampaz jolyna ainaldy. Bul týraly «Tumar» ulttyq televiziialyq báigesi jeńimpazdaryn marapattaý rásiminde QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Tumar» ulttyq televiziialyq báigesi jeńimpazdaryn marapattaý rásimine qosh keldińizder! Biyl 5-shi ret ótip otyrǵan bul joba júzden júirik shyqqan jańa esimderdi jyl saiyn jariialap, jalyndy tulǵalar men tyń bastamalardyń jasampaz jolyna ainaldy. Sóz joq, búgingi televiziia - tek aqparat kózi ǵana emes, bul ulttyq ideologiia men tálim-tárbieniń quraly. Al endi osynaý strategiialyq mańyzy zor salanyń baryn baptap, joǵyn joqtap júrgen - myna ózderińiz. Endeshe, osyndai aýqymdy jobalardy batyl qolǵa alyp, olardy biik sapada oryndap júrgen sizderge zor alǵysymdy bildirgim keledi», - dedi ministr.
Sonymen qatar ol biylǵy báige el Táýelsizdiginiń 30 jyldyǵy aiasynda ótip jatqanyn atap ótti.
«Ózderińiz kýá, osy 30 jyldyń ishinde el damýy men ulttyq BAQ, sonyń ishinde televiziia salasy úlken ózgeristerden ótti. Qarqyndy damyp, nátijeli biikterdi baǵyndyrdy. Bul árine, eń aldymen Tuńǵysh Prezident – Elbasymyzdyń aqparat salasynda qalyptastyrǵan oń saiasatynyń nátijesi, el basshylyǵynyń udaiy qoldaýynyń arqasy. Ótken 20-shy jyl elimiz úshin úlken synaq jyly boldy. Álemdik pandemiia bastalǵanda tilshiler qaýymy sonyń ishinde telejýrnalister qaýymy ómirin qaýip-qaterge tóndirip, oǵan qaramastan kún demei, tún demei jumys istep, halyqqa shynaiy aqparat jetkizdi», - dedi Aida Balaeva.
Ministr ótken jyly teleaýditoriia ósimi 22 paiyzdy quraǵanyn, otandyq televiziialyq ónimge suranystyń artqanyn aitty.
Álemdik jetekshi mediakompaniialarmen halyqaralyq yntymaqtastyq nyǵaitylyp, qazaqstandyq ónimderdi shet elderde ilgeriletý jumysy jandandyrylǵandyǵyn atap ótti.
Sonymen qatar Resei, Túrkiia, Ózbekstan, Qyrǵyzstan telekompaniialarmen birlesken televiziialyq ónim shyǵarý boiynsha ýaǵdalastyqqa qol jetkizilgenine nazar aýdartty.
«Árine, bul - osy bir jylda atqarylǵan kóp jumystyń azǵantai bóligi ǵana. Onyń bárin qazir tizip aitý múmkin emes. Eń bastysy - bolashaq baǵdarymyz anyq, josparymyz aiqyn. Ókinishke qarai, qoǵam áli de álemdik pandemiianyń yqpalynda. Sondyqtan «Tumar» syilyǵy biyl 2-shi márte onlain formatta ótip otyr. Byl 48 otandyq televiziia ókiline «Tumar» báigesiniń syilyǵy tabystalady. Onyń arasynda tanymal rejisserler men jýrnalister, kásibi operatorlar men stsenarister bar. Sóz joq, olardyń jasaǵan jumysy men jobalary otandyq televiziianyń básekege qabiletin arttyryp, kásibi deńgeige, jańa biikke kóteredi dep senemiz», - dedi ol.
Aida Balaeva sóz sońynda barsha qazaqstandyqtardy 7 mamyr – Otan qorǵaýshy kúnimen jáne 9 mamyr - Uly Jeńis merekesimen quttyqtady.
«Árine, otan qorǵaý uǵymynyń maǵynasy tereń. Shúkir búginde tynysh zaman, berekeli ómir keshýdemiz. Desede, beibit zamannyń da óz synaqtary men mindeti bar. Osy ortaq maqsat jolynda qiyndyqtardy birge eńserip, jetistikterge birge jeteiik», - dedi ministr.
