© Photo : "Ak Jaiyk"
Atqa mingeni úshin synǵa ushyraǵan general Aian Dúisebaev Atyraý oblystyq politsiia departamentiniń basshysy qyzmetinen qalai ketkenin aityp berdi, dep habarlaidy Sputnik Qazaqstan.
"Áleýmettik jelide kóptegen suraq týyndap jatqanyn bilemin. Men de kóp ýaqyt tynysh otyryp, úndemei júrdim. Biraq qazir naqty qalai bolǵanyn aitý kerek", - dedi Dúisembaev "Ashyq áńgime" jobasyna bergen suhbatynda.
Osy oraida general Atyraý oblysynyń Qyzylqoǵa aýdanynda týyp-óskenin eske saldy. Ol jerden Salyq Zimanov, Zeinolla Qabdolov siiaqty akademikter shyqqan.
"Ishki ister ministrliginde istep júrgenimde týǵan jerime baryp turdym. Sol kezde aqsaqaldar dastarqan basynda ylǵi "Aianjan, bizdiń elimizden qandai myqty adamdar shyqty, bizge jetpei turǵany – bir general" dep aityp otyratyn. 2019 jyly 6 mamyrda general ataǵy buiyrdy. Ol kezde oraza ustap júr edim. Men ministrden aýyzasharǵa deiin aýylyma baryp kelýge ruqsat suradym. Umytpasam, 11 mamyrda Qyzylqoǵa óńirine bardym. Aýyldastarmen kezdestim, meshitte aýyzashar berdim. Sol kezde aýyldastarym tulparǵa minip túsýimdi surady. Ol tulpar maǵan syilyqqa berilgen joq", - dep atap ótti Dúisembaev.
Onyń aitýynsha, aýyldastar tek yrymyn jasaýdy suraǵan.
"Eki aqsaqal kelip, nemerelerim sizge uqsasyn, tulparǵa minip túsińiz dep, aldyma tulpar ákeldi. Ústime shapan japty. Sol kezde ishki ister ministrliginen tekseris keldi, naqty bir tártip buzýshylyq anyqtai almady. Biraq prezidentimiz Qasym-Jomart Kemeluly Toqaev Twitter-de ishki ister ministrligine qatań tekserip júrgizip, shara qabyldaýdy tapsyrǵanyn jazdy. Al bas qolbasshymyz, prezidentimiz generalǵa qabaǵyn shytyp, bir eskertý jasaityn bolsa, eshteńeni kútpei-aq, jumysty bosatý kerek. Ózim baianat jazyp, óz erkimmen jumystan bosadym", - deidi general.
Sodan keiin general jeti aidai jumyssyz júripti. Al jeltoqsan aiynda Atyraý jáne Mańǵystaý oblystarynyń ákimderine hat jazǵan.
"Mańǵystaý oblysynyń sol kezdegi ákimi Serikbai Ótelgenuly ózine keńesshi bolýǵa usynys jasady. Sóitip, bir jyl úsh aidai ákimniń keńesshisi boldym", - deidi Dúisembaev.
Biyl aqpan aiynda Aian Dúisembaev Mańǵystaý oblystyq politsiia departamentiniń bastyǵy qyzmetine taǵaiyndaldy.
