Qaraǵandy oblysynda túlkini jýan aǵashpen uryp óltirgen er adamnyń kim ekeni anyqtaldy. Endi ol aiyppul tóleitin bolady, dep habarlaidy "Ult aqparat".
Bul týraly QR AShM Orman sharýashylyǵy jáne janýarlar dúniesi komitetiniń baspasóz hatshysy Sáken Dildahmet Facebook-tegi paraqshasynda jazdy.
«Jedel izdestirý sharalary barysynda túlkini zańsyz jairatyp salǵan adamnyń kim ekeni belgili boldy. Ol Qaraǵandy oblysy Shet aýdanyndaǵy Ortaý aýylynyń kúzetshi bolyp jumys isteitin turǵyny bolyp shyqty. Atalǵan azamat QR Ákimshilik quqyq buzýshylyq kodeksiniń 382-baby boiynsha ákimshilik jaýapkershilikke tartyldy. Qaraǵandy oblysynyń orman sharýashylyǵy jáne janýarlar dúniesi aýmaqtyq inspektsiiasy quqyq buzýshyny 18 375 teńge tóleýge mindetteidi», - dep jazady Sáken Dildahmet.
Eske sala ketsek, keshe Qaraǵandy oblysynda tyshqan ańdyp turǵan túlkini dýbinkamen uryp óltirgen jigittiń videosy áleýmettik jelide taraǵan bolatyn.
