Foto: okg.kz
Keler jyly Túlkibas aýdanynda jalpy investitsiialyq quny 67,5 mlrd. teńgeni quraityn 10 jobany iske asyrý josparlanǵan. Bul jobalardan jergilikti biýdjetke túsetin salyq kólemi shamamen 97,7 mln. teńgeni quraidy. Sonymen qatar, 858 azamat turaqty jumyspen qamtylatyn bolady. Josparǵa engen jobalardyń ishinde «Sastóbe innovatsiialyq kesheni» zaýyty bar. Onda kaýstikalyq soda, PVH, kaltsii karbidi men ák óndiriledi. Sonymen qatar, «Azia Food Company» un diirmeni de 2025 jyly tolyqtai iske qosylady dep josparlanǵan. Bul jaiynda Túlkibas aýdanynyń ákimi Nurjan Iztileýov óńirlik kommýnikatsiia qyzmetinde ótken brifingte aityp berdi.
– 2024 jyldyń 10 aiynda aýdandaǵy jalpy óńirlik ónim kólemi 81 mlrd. 519,2 mln. teńgeni qurady. Al, shaǵyn jáne orta biznes nysandarynyń sany 9 787-ge jetip, bul salada 13 myńnan astam adam jumys istep jatyr. 2025 jyly atalǵan salany damytý maqsatynda jalpy quny 2,2 mlrd. teńgeni quraityn 22 joba iske asyrylmaq. Bul jobalar tolyqtai júzege asyrylsa 226 jańa jumys orny qurylyp, aýdan biýdjetine qosymsha 138 mln. teńge salyq túsedi dep kútilýde, – dedi aýdan basshysy.
Sonymen qatar, aýdandy týristik aimaqqa ainaldyrý maqsatynda kóptegen jumys atqarylyp jatqanyn jetkizdi. Aitýynsha, búginde aýdanda 36 týristik nysan jumys istep tur eken. Keler jyly jalpy quny 3,1 mlrd. teńgeni quraityn 5 jobany iske asyrý josparlanyp otyr. Bul jospar tolyǵymen oryndalsa, 235 jańa jumys orny ashylatyn kórinedi.
– Túlkibas aýdanyndaǵy aýyl sharýashylyǵy óniminiń kólemi jyl basynan beri 46 mlrd. 452 mln. teńgeni qurady. 2025 jyly atalǵan salany damytý maqsatynda 8 joba iske asyrylmaq. Investitsiialyq quny 15,5 mlrd. teńgeni quraityn jobalardyń arqasynda júzge jýyq azamat jumyspen qamtylatyn bolady. Aýdandaǵy infraqurylym salasy jetilip keledi. Naqtyraq aitar bolsaq, 59 eldi mekenniń 58-i ortalyqtandyrylǵan aýyz sý qubyrymen qamtamasyz etilgen. Sonymen qatar, aýdanda 21 135 turǵyn úi bar bolsa, solardyń 99,8 paiyzy tabiǵi gaz tutynyp otyr, – deidi Nurjan Jaqsylyquly.
