فوتو: okg.kz
كەلەر جىلى تٷلكٸباس اۋدانىندا جالپى ينۆەستيتسييالىق قۇنى 67,5 ملرد. تەڭگەنٸ قۇرايتىن 10 جوبانى ٸسكە اسىرۋ جوسپارلانعان. بۇل جوبالاردان جەرگٸلٸكتٸ بيۋدجەتكە تٷسەتٸن سالىق كٶلەمٸ شامامەن 97,7 ملن. تەڭگەنٸ قۇرايدى. سونىمەن قاتار, 858 ازامات تۇراقتى جۇمىسپەن قامتىلاتىن بولادى. جوسپارعا ەنگەن جوبالاردىڭ ٸشٸندە «ساستٶبە يننوۆاتسييالىق كەشەنٸ» زاۋىتى بار. وندا كاۋستيكالىق سودا, پۆح, كالتسيي كاربيدٸ مەن ەك ٶندٸرٸلەدٸ. سونىمەن قاتار, «Azia Food Company» ۇن ديٸرمەنٸ دە 2025 جىلى تولىقتاي ٸسكە قوسىلادى دەپ جوسپارلانعان. بۇل جايىندا تٷلكٸباس اۋدانىنىڭ ەكٸمٸ نۇرجان ٸزتٸلەۋوۆ ٶڭٸرلٸك كوممۋنيكاتسييا قىزمەتٸندە ٶتكەن بريفينگتە ايتىپ بەردٸ.
– 2024 جىلدىڭ 10 ايىندا اۋدانداعى جالپى ٶڭٸرلٸك ٶنٸم كٶلەمٸ 81 ملرد. 519,2 ملن. تەڭگەنٸ قۇرادى. ال, شاعىن جەنە ورتا بيزنەس نىساندارىنىڭ سانى 9 787-گە جەتٸپ, بۇل سالادا 13 مىڭنان استام ادام جۇمىس ٸستەپ جاتىر. 2025 جىلى اتالعان سالانى دامىتۋ ماقساتىندا جالپى قۇنى 2,2 ملرد. تەڭگەنٸ قۇرايتىن 22 جوبا ٸسكە اسىرىلماق. بۇل جوبالار تولىقتاي جٷزەگە اسىرىلسا 226 جاڭا جۇمىس ورنى قۇرىلىپ, اۋدان بيۋدجەتٸنە قوسىمشا 138 ملن. تەڭگە سالىق تٷسەدٸ دەپ كٷتٸلۋدە, – دەدٸ اۋدان باسشىسى.
سونىمەن قاتار, اۋداندى تۋريستٸك ايماققا اينالدىرۋ ماقساتىندا كٶپتەگەن جۇمىس اتقارىلىپ جاتقانىن جەتكٸزدٸ. ايتۋىنشا, بٷگٸندە اۋداندا 36 تۋريستٸك نىسان جۇمىس ٸستەپ تۇر ەكەن. كەلەر جىلى جالپى قۇنى 3,1 ملرد. تەڭگەنٸ قۇرايتىن 5 جوبانى ٸسكە اسىرۋ جوسپارلانىپ وتىر. بۇل جوسپار تولىعىمەن ورىندالسا, 235 جاڭا جۇمىس ورنى اشىلاتىن كٶرٸنەدٸ.
– تٷلكٸباس اۋدانىنداعى اۋىل شارۋاشىلىعى ٶنٸمٸنٸڭ كٶلەمٸ جىل باسىنان بەرٸ 46 ملرد. 452 ملن. تەڭگەنٸ قۇرادى. 2025 جىلى اتالعان سالانى دامىتۋ ماقساتىندا 8 جوبا ٸسكە اسىرىلماق. ينۆەستيتسييالىق قۇنى 15,5 ملرد. تەڭگەنٸ قۇرايتىن جوبالاردىڭ ارقاسىندا جٷزگە جۋىق ازامات جۇمىسپەن قامتىلاتىن بولادى. اۋدانداعى ينفراقۇرىلىم سالاسى جەتٸلٸپ كەلەدٸ. ناقتىراق ايتار بولساق, 59 ەلدٸ مەكەننٸڭ 58-ٸ ورتالىقتاندىرىلعان اۋىز سۋ قۇبىرىمەن قامتاماسىز ەتٸلگەن. سونىمەن قاتار, اۋداندا 21 135 تۇرعىن ٷي بار بولسا, سولاردىڭ 99,8 پايىزى تابيعي گاز تۇتىنىپ وتىر, – دەيدٸ نۇرجان جاقسىلىقۇلى.
