QR Bilim jáne ǵylym ministri mekteppen qoshtasý keshterin ótkizýge qatysty pikir bildirdi, dep xabarlaidy "Ult aqparat".
"Negizi, bul másele jyl saiyn kóterilip turady. Biraq burynnan beri kele jatqan jaqsy bir dástúr bar. Ol - túlekterdiń keshin mektepte ótkizý. Ondaida muǵalim men oqýshy arasynda saliqaly áńgimeler aitylady, túlekterdiń ózara qarym-qatynasy da basqasha júredi. Ókinishke qarai, sońǵy kezderi kim jáne qaida ótkizedi, kádimgidei báseke bolyp ketti. Menińshe, túlekterdiń keshi burynǵydai ótýi kerek. Bizdiń ata-analarymyz solai ótkizdi. Biz de mektepte ótkizdik. Sonda naǵyz mekteppen qoshtasý keshi bolady", - dedi K.Shámshidinova Úkimet úiinde ótken baspasóz máslixatynda.
Ministrdiń aitýynsha, kez kelgen sharada mektep te, ata-analar da balalardyń qaýipsizdigine basa nazar aýdarýy qajet.
"Sol sebepti biz ondai keshter tek mekteptiń territoriiasynda ǵana ótýi kerek dep sanaimyn. Artyq aqsha shashýdyń da qajeti joq. Asta-tók otyrys jasamaý kerek. Qymbat kóilek alýdyń da qajeti shamaly. Túlekter keshi ol úshin jasalmaidy. Ózara báseke úshin jasalmaidy. Mekteppen qoshtasý keshi janǵa jaily kezdesý bolyp ótýi kerek. Balalar, ata-analar men muǵalimderdiń saliqaly bir otyrysy bolýy qajet", - dep atap kórsetti K.Shámshidinova.
Sondai-aq ol qaita daiarlaý kýrstarynyń paidasy týraly aitty.
«Bárimiz jaqsy bilemiz, jalpy mekteptegi bilimniń sapasy muǵalimge bailanysty. Sol sebepti eń birinshi muǵalimderdiń kásiptik deńgeiin kóterýge baǵyttalǵan jumystar júrgiziletin bolady. Aldaǵy úsh jyldyń ishinde 144 myń muǵalim qaita daiarlaý kýrstarynan ótedi. 82 myń synyp jetekshileri men psixolgtar da ótetin bolady. Búginde ustazǵa da, ata-anaǵa da, balaǵa da psixologtyń kómegi óte qajet. Sondyqtan biyldan bastap biz psixologtar men klas jetekshilerin qaita daiarlaý kýrstarynan ótkizemiz. Sebebi mektep pen ata-ananyń arasyndaǵy eń birinshi dáneker, eń birinshi bailanystyrýshy ol - klas jetekshisi», - dedi K.Shámshidinova Úkimet úiinde ótken baspasóz máslixatynda.
Ministrdiń aitýynsha, qaita daiarlaý kýrstarynan kolledj qyzmetkerleri de ótedi. Olardyń sany 15 myńnan asady. Budan bólek, joǵary oqý oryndarynyń 2,5 myń oqytýshysy kásibi biliktiligin kóteretin bolady.
«Jalpy, biz ustazdarǵa ádistemelik kómek te kórsetýimiz kerek. Osyǵan bailanysty ádistemelik keshen - www.smk.edu.kz jumys istep tur. Onda 100 myńnan astam material bar. Jańa oqý jylynyń qarsańynda qazaq pen orys tiline qosymsha aǵylshyn tilindegi bólimi de ashylatyn bolady», - dep atap kórsetti K.Shámshidinova.
