Senattyń jalpy otyrysynda depýtat Aqylbek Kúrishbaev óziniń depýtattyq saýalynda tuqym sharýashylyǵy men selektsiialyq ǵylym salasyndaǵy eleýli problemalar týraly aityp berdi, dep habarlaidy "Ult aqparat".
Depýtat Úkimet basshysynyń orynbasary Roman Skliardiń atyna joldaǵan saýalynda salada kúrdeli jaǵdai týyndaǵanyn jáne ony sheshýdi kesheýildetýge bolmaitynyn atap ótti.
Aqylbek Kúrishbaevtyń aitýynsha, tuqymdyq material sapasy tómendep barady, al aýyl eńbekkkerleri jyl saiynǵy jinaityn egin de azaia túsýde. Ónim sorttary men býdandarynyń shamamen 70 paiyzy, al birqatar daqyldar jáne odan da kóbiregi bizge shetelden ákelinedi. Sonymen qatar, ákelinetin tuqymdardyń basym kópshiligi bizdiń topyraq pen klimattyq jaǵdaiymyzǵa beiimdelmegen bolyp otyr.
Depýtat bólingen memlekettik sýbsidiialar sheteldik tuqymdardy arzandatýǵa jumsalatynyna narazy. Bul rette, otandyq agrarshy ǵalymdarǵa óz jumystaryn júrgizý úshin biyl áli kúnge deiin qarjy bólingen joq.
Osyǵan bailanysty Aqylbek Kúrishbaev ǵylymdaǵy jaǵdaidy jaqsartý jóninde birqatar usynystaryn aitty. Onyń basty maqsaty - joǵary ónimdi jáne kúizeliske tózimdi sorttar men daqyldardyń býdandaryn ázirleý bolýy kerek. Bul úderiske mindetti túrde otandyq agrarlyq ǴZI men joǵary oqý oryndary, biotehnologiia ortalyqtary, sondai-aq jetekshi sheteldik ǵalymdar qosylýy tiis. Bul úderisti zańnamalyq qoldaý da mańyzdy.
«Selektsiia men tuqym sharýashylyǵyndaǵy avtorlyq quqyqtardy qorǵaý, qazirgi zamandaǵy sertifikattaý ádisterin qoldana otyryp selektsiialyq jetistikterdi tirkeý, standarttar men ǵylymi-ádistemelik bazany jańartý jónindegi zańnamalyq ári normativtik bazany kúsheitý qajet. Sondai-aq selektsiia jáne tuqym sharýashylyǵy sýbektileriniń materialdyq-tehnikalyq, zerthanalyq bazasyn nyǵaitýǵa kómek kórsetý, elde aýyl sharýashylyǵy daqyldarynyń genetikalyq resýrstarynyń Ulttyq bankin uiymdastyrý mańyzdy», - dedi Kúrishbaev.
Senator tuqym sharýashylyǵy júiesine memlekettik qoldaýdy kúsheitip, otandyq sorttardy sýbsidiialaý tetigin qaita qaraý kerek dep sanaidy. Bul usynystardyń bári 2021-2025 jyldarǵa arnalǵan AÓK damytý jónindegi ázirlenip jatqan ulttyq jobada kórinis tapqany jón.
