«100 jańa esim» jobasy jańǵyrýǵa umtylǵan jańashyl qoǵamǵa tyń serpilis syilady. Bul týraly Aqordada ótken Qoǵamdyq sanany jańǵyrtý jónindegi ulttyq komissiia otyrysynda QR Aqparat jáne qoǵamdyq damý ministri Aida Balaeva aitty, dep habarlaidy QazAqparat.
«Atqarylǵan naqty jobalarǵa kelsek, ózderińizge málim, aityp kelmegen indettiń saldarynan kóptegen sharalar onlain formatqa aýystyrylyp, birqatarynan bas tartýǵa týra keldi. Dese de, pandemiia qiyndyqtaryna qaramastan, ministrlik júrgizgen eki keshendi joba boiynsha aitarlyqtai nátijelerge qol jetkenin erekshe atap ótý kerek. Máselen, bir ǵana «Týǵan jer» jobasy boiynsha biylǵy jyldyń ózinde 1 231 demeýshi azamattardyń arqasynda elimizdiń ár aimaǵynda rýhani mańyzy bar 228 nysan salyndy. Onyń ishinde 2 mektep, 2 balabaqsha, 19 mádeniet obektileri, 36 sport alańdary, 31 balalar alańdary jáne taǵy basqalary bar. Iaǵni, qarjylai sanaǵanda óńirlerge 10 mlrd teńgeniń investitsiiasy quiyldy», - dedi ministr.
Munan bólek, ol Elbasynyń tikelei bastamasymen 2017 jyldan beri ótkizilip kele jatqan «100 jańa esim» jobasy boiynsha úsh jylda 6 myńnan azamattan halyq tańdaǵan 163 tulǵa anyqtalǵanyn eske saldy.
«Bul - qoǵamdyq salada ǵana emes, ǵylym men tehnologiiada, kásipkerlikte úlken jetistikke jetken azamattar. Sóz joq, olardyń el aldyna shyǵýy – jańǵyrýǵa umtylǵan jańashyl qoǵamǵa tyń serpilis, jańa lep syilady», - dedi Aida Balaeva.
Eske sala keteiik, Memlekettik hatshy Qyrymbek Kósherbaevtyń tóraǵalyǵymen ótken komissiia otyrysynda «Rýhani jańǵyrý» baǵdarlamasyn odan ári tereńdetip, Ulttyq jańǵyrý kezeńine ótkizýdiń arnaiy Jol kartasyn jasaý qajet degen sheshim qabyldandy. Bul qujat asa mańyzdy ulttyq joba retinde júrgiziledi.
Ulttyq jańǵyrý jobasynyń eń basty máni – Ulttyń básekege qabilettiligin arttyrý. Bul – ulttyq jańǵyrýdyń strategiialyq maqsaty bolyp qalady. Jol kartasynda Memlekettik til mártebesin arttyrý, Bilim jáne ǵylymdy damytý, Joǵary ulttyq jáne jalpyadamzattyq qundylyqtar negizinde rýhani-adamgershilik jáne patriottyq tárbie berý, Eńbek adamyn qalyptastyrý, Aýyldy túletý siiaqty t.b keshendi is-sharalar qamtylady. Memlekettik hatshy otyrysty qorytyndylai kele, «Rýhani jańǵyrý» baǵdarlamasynyń basym baǵyttary boiynsha jumysty odan ári jandandyrý boiynsha naqty tapsyrmalar berdi.
