QR Prezidenti Ákimshiliginiń memlekettik baqylaý jáne aimaqtyq uiymdastyrý bóliminiń meńgerýshisi Nurlan Saýranbaev «Týǵan jer» jobasyna júrgizilgen taldaý jumystarynyń qorytyndysyn jariialady, dep habarlaidy QazAqparat.
«Týǵan jer» jobasy aiasynda 2019 jyly 14 myńnan astam is-shara ótkizildi. 4 millionnan astam adam qamtyldy. 2019 jyly metsenattar esebinen 1 myńnan asa áleýmettik mańyzy bar nysan salyndy, 700-den astam nysan kúrdeli jóndeýden ótkizilip, aýyldar men qalalardy damytýǵa baǵyttalǵan jobalar iske asyryldy. Qarjylandyrý kólemi 60 mlrd teńgeden asty», - dedi ol Aqordada ótken jiynda.
Nurlan Saýranbaev óz sózin naqty mysaldarmen atap ótti. Onyń aitýynsha, Aqmola oblysynda metsenattar balalarǵa arnalǵan alańdar salyp, mýzeilerdi jóndep, kópbalaly jáne tabysy az otbasylarǵa kómek kórsetken. Al Qostanai oblysynda metsenattar jastardyń, onyń ishinde aýyl jastarynyń básekege qabilettigin arttyrýǵa úles qosyp, 2019 jyldyń qyrkúieginde mektepke 13,5 mln teńgege kompiýterlik tehnika satyp alyp bergen. Sol sekildi BQO-da «Bolashaqqa joldama» jobasy iske asyrylýda. Onyń sheńberinde óńir kásipkerleri daryndy jastardyń bilim alýyna kómek kórsetedi.
Dese de, bólim meńgerýshisi «Týǵan jer» baǵdarlamasy boiynsha problemalardyń baryn da jasyrǵan joq.
«Atap aitqanda, 2018 jylǵa qaraǵanda joba boiynsha qarjylandyrý deńgeii 40 paiyzǵa azaiyp qaldy. Onyń bir sebebi – óńirlerde jobalardy tirkeý esebi sapaly túrde júrgizile bastady. Sonymen qatar óńirlerde metsenattardyń qarjy bólý boiynsha 2019 jylǵy kórsetkishterin salystyratyn bolsaq, eń kóbi - Mańǵystaý oblysynda (14 mlrd teńge). Sol sekildi Atyraý óńirinde metsenattar 7 mlrd teńge qarajat bólgen. Qarjylandyrýdyń mundai kólemi birqatar óńirdiń biznestiń óz qajettiligi úshin salynǵan nysandaryn, biznestiń áleýmettik jaýapkershiligi boiynsha sheteldik kompaniialar salǵan nemese MJÁ aiasynda boi kótergen nysandardyń tizimge kirgizilýimen túsindiriledi», - dedi ol.
Nurlan Saýranbaev Mańǵystaý oblysynda Dostyq úiiniń salynǵanyn úlgi etti.
«Mundai mysaldar basqa aimaqtarda da kezdesedi. Usynylǵan málimetterdi taldaý jumystary kórsetkendei, aimaqtarda bul baǵyttaǵy jumystardyń joǵary disproportsiiasy baiqalady. Máselen, SQO bul baǵytta 510 myń adamnyń jumyldyrylýymen 1155 sharanyń ótkeni jaily esep beredi. Al onda halyqtyń sany 549 myń adam ǵana. Al Pavlodar oblysynda 100 myń adamnyń qamtylýymen 372 shara uiymdastyrylǵan. Jalpy, «Týǵan jer» jobasy boiynsha sharalar legi 100-den (Nur-Sultan qalasy men Qaraǵandy oblysy) 2 myńǵa deiingi (Aqmola, Qostanai, Túrkistan oblystary) aralyqta uiymdastyrylǵan», - dedi ol.
Eske sala ketsek, Memlekettik hatshy Qyrymbek Kósherbaevtyń tóraǵalymen Aqordada búgin QR Prezidenti janyndaǵy Qoǵamdyq sanany jańǵyrtý baǵdarlamasyn iske asyrý jónindegi Ulttyq komissiianyń otyrysy ótti.
.jpeg)