Elorda mańynda ornalasqan Qosshy eldi mekeninde sońǵy kúnderi koronavirýs juqtyrýdyń 15 jaǵdaiy tirkeldi. Bul týraly QR memlekettik bas sanitarlyq dárigeri Aijan Esmaǵambetova aitty, dep habarlaidy "Ult aqparat".
«Shynymen de, Qosshy eldi mekeninde sońǵy kúnderi 15 jaǵdai anyqtaldy. Bul 15 jaǵdai 2 oshaqta tirkelgen. Olardyń barlyǵy da týystar, olardyń 8-i týǵan kúnge barǵan jáne barlyǵy naýqastanyp qaldy. Bul - karantin sharalaryn saqtamaý juqtyryp alý táýekelin kúrt arttyratyndyǵyn jáne otbasy ishinde bárine juǵýy múmkin ekendigin bildiredi», - dedi búgin elimizdiń bas sanitarlyq dárigeri Ortalyq kommýnikatsiialar qyzmetindegi brifingte.
Sonymen qatar ol úilerdiń jáne olarǵa kireberisterdiń karantinge jabylýyna qatysty saýalǵa jaýap berdi.
«Bastapqyda bizdiń birde-bir normativtik-quqyqtyq aktimizde, onyń ishinde bas sanitarlyq dárigerdiń qaýlylarynda úilerge kireberisterdi jabý qarastyrylmaǵan edi. Árine, jaqyn bailanysta bolǵandardyń, yqtimal bailanysta bolǵandardyń barlyǵy anyqtalady. Buǵan qosa, bul bailanysta bolǵandardyń barlyǵy úi karantininde otyrady. Biraq, biz kireberisterdi jabý týraly eshqandai shara qabyldaǵan emespiz», - dedi Aijan Esmaǵambetova.
