Qazaqstanda jyl basynan beri kiberalaiaqtyqqa qatysty 9 myńnan astam qylmystyq is tirkeldi, dep habarlaidy ult.kz.
24KZ telearnasynnyń habarlaýynsha, osy kezeńde kiberqylmysqa qatysy bar 750-ge jýyq adam jaýapkershilikke tartylǵan.
Mamandardyń aitýynsha, kóptegen azamat akkaýnttaryn qorǵaý úshin týǵan kúnin, telefon nómirin nemese qarapaiym sandar kombinatsiiasyn parol retinde qoldanady. Alaida mundai qupiiasózderdi alaiaqtar men hakerler jaqsy biledi.
Álemde eń jii qoldanylatyn parolderdiń qatarynda áli kúnge deiin «123456» jáne «QWERTY» sekildi qarapaiym nusqalar kósh bastap tur. Sarapshylar mundai parolderdiń birneshe sekýnd ishinde buzylýy múmkin ekenin eskertedi.
Sonymen qatar bir paroldi birneshe akkaýntta paidalaný da qaýipti. Eger bir servistegi derekter syrtqa shyǵyp ketse, qaskóiler basqa akkaýnttarǵa da ońai qol jetkize alady. Sondyqtan mamandar ár servis úshin bólek parol ornatyp, qos faktorly aýtentifikatsiiany qosýdy usynady.
QR IIM Kiberqylmysqa qarsy is-qimyl departamentiniń basqarma bastyǵy Beibit Birjanov azamattardy kúmándi qońyraýlar men habarlamalarǵa senbeýge shaqyrdy. Onyń aitýynsha, quqyq qorǵaý organdary men bank qyzmetkerleri WhatsApp arqyly nemese telefonmen arnaiy operatsiialar júrgizbeidi.
Mamandardyń pikirinshe, onlain alaiaqtardyń qurbany kez kelgen adam bolýy múmkin. Sondyqtan jeke derekterdi qorǵaýdyń eń tiimdi joly – tsifrlyq saýattylyqty arttyryp, kúmándi áreketterge saqtyqpen qaraý.
