Álemde 2020-2025 jyldar aralyǵynda COVID-19 áseri saldarynan týberkýlezge shaldyqqan 1,4 million naýqas qaitys bolýy múmkin. Bul týraly 18-19 qarashada ótken «Týberkýlezdi toqtatý» Seriktestik keńesi basqarmasynyń 33-otyrysynda aityldy, dep habarlaidy "Ult aqparat".
Otyrysqa QR Densaýlyq saqtaý ministri Aleksei Tsoi qatysty.
«Álemdik qaýymdastyq týberkýlezge shaldyqqan árbir naýqasty nazardan, meditsinalyq jáne áleýmettik kómekten tys qaldyrmaýy kerek. Ásirese pandemiia kezinde. Onyń ústine, Dúniejúzilik densaýlyq saqtaý uiymynyń baǵalaýy boiynsha 2020-2025 jyldar aralyǵynda 6,3 million adam týberkýlezge shaldyǵady jáne COVID-19 áseri saldarynan 1,4 million naýqas qaitys bolýy múmkin», - delingen QR Densaýlyq saqtaý ministrliginiń aqparatynda.
«Álem elderi birigip kúreskende ǵana qoǵamdyq aýrýǵa ainalǵan týberkýlezdi joia alamyz», - dedi A. Tsoi.
Jiyn aiasynda Afrika Densaýlyq saqtaý ministrleriniń qatysýymen dóńgelek ústel otyrysy ótti. Onda ministr Aleksei Tsoi álemdik qoǵamdastyqty, ásirese koronavirýs infektsiiasy pandemiiasy kezinde Meditsinalyq-sanitarlyq alǵashqy kómekti kúsheitýge shaqyrdy. Ministr qazir Qazaqstannyń týberkýlezben aýyratyn naýqastarǵa statsionarlyq deńgeide kómek kórsetý modelinen MSAK jáne statsionardy almastyratyn emdeý modeline kóshkenin habarlady.
«Biz týberkýlezge qarsy uiymdardy qarjylandyrýdyń jańa tetigin ázirledik. Tósek-oryn qoryn qysqartý esebinen únemdelgen qarajat qaita bólinedi. Osylaisha, týberkýlezge shaldyqqan naýqastardy ambýlatoriialyq emdeý múmkindigi keńeidi, emdeý men profilaktikada jańa tehnologiialar qoldanylýda, MSAK deńgeiinde naýqastarǵa psiho-áleýmettik qoldaý kórsetiledi», - dedi Tsoi.
