Facebook kompaniiasynyń basshysy Mark Tsýkerberg Resei qoldaityn jáne áleýmettik jelini sailaýda túrli aila-sharǵy jasap, qoǵamdyq pikirge yqpal etýge qoldanǵysy keletin toptarǵa batyl qarsy turatynyn málimdedi. 33 jastaǵy internet-magnat bul týraly 11 sáýirde AQSh Senatynda ótken tyńdaýda aitty, dep jazady Azattyq.
Senatorlar Tsýkerbergke áleýmettik jeliniń AQSh-taǵy prezident sailaýyna syrttan yqpal etýge qoldanylǵany, jeke hat-habar almasý qupiiasy men qoldanýshylardyń jeke málimeti týraly qupiianyń buzylǵany týraly suraqtar qoidy.
Tsýkerberg Cambridge Analytica kompaniiasynyń AQSh-taǵy prezident sailaýy nátijesine yqpal etý úshin 87 million qoldanýshynyń jeke málimetterin jinaý áreketine tosqaýyl qoia almaǵanyna jaýapty ekenin málimdedi.
Ol sonymen qatar jalǵan aqparatqa, sheteldiń kiligýine jáne jelide "jekkórýshilik sipatyndaǵy sózderdiń" paida bolýyna qarsy jetkilikti is-sharalar qoldanbaǵanyn moiyndady.
Kongreste sóilegen Tsýkerberg "Reseide bizdiń júiemizdi jáne basqa da internet júielerin paidalanýǵa tyrysatyn adamdar bar" dedi. Tsýkerberg muny "qarýlaný básekesi" dep atap, sailaý kampaniiasyna syrttan yqpal etýge qarsy turý úshin Facebook-ti kúsheitýdiń mańyzdy ekenin aitty.
Facebook basshysy "2016 jyly AQSh-taǵy prezident sailaýy ýaǵynda reseilik aqparattyq operatsiialardyń baiaý áshkerelengeni" eń úlken ókinish bolǵanyn aitty. "Biz áýel basta áshkerelengen dástúrli kibershabýyl jaǵdaiynda jumys isteýge daiyn boldyq. Biraq jańa aqparattyq operatsiialardy jedel ańǵara almadyq" dedi Mark Tsýkerberg.
Ol sonymen qatar osy jyldyń sońyna deiin aqparattyq qaýipsizdik jáne kontent-analiz qyzmetkerleriniń sanyn 20 myńǵa deiin arttyrý jospary baryn habarlady. Tsýkerbergtiń aitýynsha, Facebook endigi jalǵan akkaýnttardy tani alatyn jańa jasandy intellekt quraldaryn qoldana bastaǵan.
Mark Tsýkerbergtiń sózinshe, Facebook Resei men AQSh-tyń qazirgi prezidenti Donald Tramptyń sailaý kampaniiasy qyzmetkerleriniń arasyndaǵy bailanysty tekserip jatqan arnaiy prokýror Robert Miýllermen yntymaqtastyq ornatqan.
