Densaýlyq saqtaý ministri Aleksei Tsoi Prezidenttiń atyna joldaǵan videosy áleýmettik jelide birshama rezonans týdyrǵan shymkenttik reabilitolog Aina Bakeevamen sóileskenin aitty, dep habarlaidy "Ult aqparat".
«Em-domnyń kúrdeli ádisi boiynsha ótinim jasaǵan dáriger Aina Bakeevanyń habarlamasyna qatysty birshama suraq kelip tústi. Búgin onymen bailanysqa shyǵyp, 40 minýttai sóilestim. Negizgi problemany, dárigerdiń neni jetkizgisi kelgenin túsindim. Ol áleýmettik jelilerde, tipti meditsina qyzmetkerleriniń aitýy boiynsha da em-domnyń túr-túri tarap ketkenine alańdaýshylyq bildirip jatyr. Em-dom túrlerin áleýmettik jelilerde kórip alǵan adamdardyń da oiy san-saqqa ketedi. Al keibir preparattar kerisinshe, densaýlyqty nasharlatady. Suraqtarǵa jaýap tapqysy keletin myńdaǵan adam Aina Bakeevaǵa júginedi eken», - deidi Aleksei Tsoi búgin OKQ-da ótken baspasóz máslihatynda.
Osy oraida ol Densaýlyq saqtaý ministrligi halyqqa arnalǵan keńesterdi resmi bekitkenin málim etti.
«Qazir Densaýlyq saqtaý ministrligi mamandarmen bekitilgen naqty resmi keńesterdi ázirledi. Ol Densaýlyq saqtaý ministrliginiń saityna jariialanady. Áleýmettik jeliler arqyly da halyqqa jetkiziledi. Ol da (dáriger Aina Bakeeva) em-dom hattamasyn óz resýrstary arqyly azamattarǵa jetkizetinin aitty», - dedi ministr.
Aita keterligi budan buryn Aina Bakeeva KVI naýqastaryn emdeýge qatysty syn aityp, áleýmettik jelilerge video jariialaǵan bolatyn.
