Qazaqstanda shamamen 800 adam koronavirýsty qaita juqtyryp aldy. Bul týraly QR Densaýlyq saqtaý ministri Aleksei Tsoi aitty, dep habarlaidy "Ult aqparat".
«Eger adam bir ret aýyrsa, qaitadan aýyrmaidy degen túsinik - múldem qate. Muny túsinýimiz qajet. Qazaqstanda qazirgi ýaqytta shamamen 800 adam koronavirýspen qaitadan aýyryp qalǵan. Olar vaktsina almaǵan bolatyn. Jalpy, bul tek Qazaqstanda ǵana emes ózge de elderge tán úrdis. Eýropada jáne ózge de elderde myńdaǵan adam qaitadan aýyryp jatyr», - dedi ministr Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, ózińdi jáne janyńdaǵy adamdardy qorǵaý úshin vaktsina alǵan durys. Ásirese, birinshi kezekte 60 jastan asqan jáne sozylmaly aýrýlary bar azamattar ekpe alǵany jón.
«Biz barlyq azamattarǵa ekpeni belsendi túrde alýǵa keńes beremiz. Infraqurylymdyq turǵyda alǵanda Qazaqstannyń árbir óńirinde, tipti saýda ortalyqtarynda ekpe pýnktteri ashylǵan. Ózderińiz de dúrbeleń joq ekenin kórip otyrsyz. Elimizdiń barlyq azamaty tegin vaktsinanyń tiesili dozany emin-erkin saldyra alady», - dedi Aleksei Tsoi.
