Foto: QyzPU
Qazaq ulttyq qyzdar pedagogikalyq ýniversitetiniń professory, Fizika, matematika jáne tsifrlyq tehnologiialar institýtynyń direktory Gúlnaz Ibragimqyzy Salǵaraeva Memleket basshysynyń Joldaýynda aitylǵan bilim, ǵylym jáne jasandy intellektke qatysty bastamalardy elimizdiń jańa serpini dep baǵalap, bul baǵytta ýniversitettiń atqaryp jatqan jumystarymen bólisti.
Memleket basshysy Qasym-Jomart Kemeluly Toqaev búgingi Qazaqstan halqyna arnaǵan Joldaýynda bilim berý, jasandy intellekt, ǵylym jáne tsifrlyq tehnologiialardy damytý máselelerine erekshe nazar aýdardy. Bul qujat elimizdiń jańa damý kezeńine qadam basqanyn kórsetip qana qoimai, árqaisymyzdyń ómirimizge, ásirese jastar men bilim salasynyń ókilderine tikelei áser etetin strategiialyq baǵyttardy aiqyndady. Mektepterde, kolledjderde jáne joǵary oqý oryndarynda jasandy intellekt tehnologiialaryn meńgertý – basty basymdyqtardyń biri retinde atap ótildi.
Joldaýda tsifrlyq úkimetti damytý, jasandy intellektini engizý máseleleri keńinen qarastyryldy. Jasandy intellekt ulttyq ortalyǵynyń qurylýy jáne túrli baǵdarlamalardyń iske qosylýy – elimizdiń tsifrlyq transformatsiiany jedeldetip, barlyq salada innovatsiialyq sheshimderdi qoldanýǵa nietti ekenin aiqyn kórsetedi.
Qazaq ulttyq qyzdar pedagogikalyq ýniversiteti AI-SANA baǵdarlamasynyń negizgi baǵyttaryna belsendi qatysyp keledi. 2024-2025 oqý jylynda 12 myńnan astam stýdent, magistrant jáne doktorant Coursera, Huawei, Astana Hub platformalarynda jasandy intellekt boiynsha kýrstardy aiaqtap, sertifikat aldy. Ýniversitettiń biliktilikti arttyrý ortalyǵy 2024 jyly 136, al 2025 jyly 272 oqytýshyny «Bilim berýdegi jasandy intellekt: negizderi jáne praktikalyq qoldaný» kýrsy boiynsha oqytty. Sonymen qatar barlyq bilim berý baǵdarlamalaryna «Jasandy intellekt negizderi» páni engizildi, al 2025 jyly «Qoldanbaly jasandy intellekt» atty jańa baǵdarlama ashyldy.
Ýniversitet stýdentteri startaptar men innovatsiialyq jobalarǵa belsendi qatysýda. Máselen, 2 kýrs informatika stýdentteri «Tomiris» startap jobasymen gran-pri jeńip alyp, ýniversitetten 3 mln teńge kóleminde qarjylai qoldaý aldy. Respýblikalyq deńgeide «IQ Alaman 2025: AI InnovateTech» baiqaýy uiymdastyrylyp, elimizdiń barlyq aimaqtarynan kelgen stýdentter jasandy intellekti qoldanýǵa arnalǵan sheshimder usyndy.
Halyqaralyq seriktestik aiasynda Túrkiianyń Niide ýniversitetimen birlesip «Tech QYZPU NIGDE Hack: 24 hours of code and creativity» atty hakaton ótkizildi. Sondai-aq, 2024 jyldyń jeltoqsanynan bastap Gonkong ǵylym jáne tehnologiia ýniversitetimen (HKUST) STEM-bilim, robototehnika jáne jasandy intellekt boiynsha birlesken jobalar júzege asyrylýda. 2025 jyldyń tamyzynda ýniversitet stýdentteri men jas oqytýshylaryna arnalǵan AI jazǵy mektebi HKUST bazasynda uiymdastyrylyp, qatysýshylar jetekshi professorlardyń dáristerine qatysyp, zerthanalarda tájiribe júrgizdi.
Pedagogikalyq joǵary oqý orny retinde biz Joldaýda aitylǵan mindetterdiń iske asyrylýyna óz úlesimizdi qosamyz. Stýdentterge zamanaýi tsifrlyq zerthanalar quryp, tájiribelik daǵdylardy damytýǵa jaǵdai jasaý, jańa kýrstar men seminarlardy uiymdastyrý jáne ǵylymi jobalarǵa tartý – basty mindetimiz. Sonymen qatar startap-jobalardy qoldaý arqyly jastardyń óz bastamalaryn júzege asyrýyna múmkindik berýdi jalǵastyramyz.
Prezident bastamalary bilim men ǵylymdy jańa deńgeige kóterip, jastarǵa keń múmkindikter ashatynyna senimdimin. Tsifrlyq infraqurylymdy damytý, jasandy intellektini oqý úderisine engizý – Qazaqstannyń básekege qabiletti urpaǵyn tárbieleýdiń naqty qadamy.
Gúlnaz Ibragimqyzy SALǴARAEVA,
Fizika, matematika jáne tsifrlyq tehnologiialar institýtynyń direktory,
tehnika ǵylymdarynyń kandidaty, professor
