Qazaqstanda elektrsamokat júrgizýshilerine qatysty jańa talap engizildi. 25 tamyzdan bastap trotýarmen júrgen azamattarǵa 2 ailyq eseptik kórsetkish (8650 teńge) kóleminde aiyppul salynady, dep habarlaidy ult.kz.
Jańa ózgeris 24 maýsymda qabyldanǵan zań aiasynda engizildi. Buǵan deiin elektrsamokat júrgizýshileri velosiped joly bolmaǵan jaǵdaida jaiaý júrginshilerge kedergi keltirmei, saǵatyna 6 shaqyrymnan aspaityn jyldamdyqpen trotýarmen júrýge quqyly bolatyn. Endi bul norma zańnan alynyp tastaldy.
Jańa talapqa sáikes, elektrsamokat júrgizýshileri aldymen velosiped jolymen nemese velosiped jolaǵymen qozǵalýy tiis. Ondai múmkindik bolmaǵan jaǵdaida joldyń oń jaq jiegimen nemese jol jiegimen júrýge mindetti.
Ákimshilik quqyq buzýshylyq týraly kodekstiń 615-babyna sáikes, jol qozǵalysy erejesin alǵash ret buzǵan elektrsamokat júrgizýshilerine 2 AEK kóleminde aiyppul salynady. Bul jaza endi trotýar men jaiaý júrginshiler jolynda zańsyz júrgenderge de qoldanylady.
Elektrsamokattar memlekettik tirkeýge jatpaityndyqtan, quqyq buzýshylyqty tirkeý úshin politsiia qyzmetkerleri júrgizýshini oqiǵa ornynda toqtatýy qajet.
Sonymen qatar, 1 shildeden bastap jalǵa beriletin (kikshering) elektrsamokattarǵa jańa talaptar engiziledi. Olardyń tehnikalyq baiqaýdan ótýi, mindetti saqtandyrý rásimdeýi, paidalanýshynyń júrgizýshi kýáliginiń bolýy jáne memlekettik tirkeýden ótip, nómirlik belgi alýy mindetteledi. Bul talaptar jeke menshik samokattarǵa qoldanylmaidy.
Eger elektrsamokat júrgizýshisi politsiianyń toqtaý týraly zańdy talabyn oryndamasa, ol Ákimshilik quqyq buzýshylyq týraly kodekstiń 613-baby boiynsha jaýapqa tartylady. Mundai jaǵdaida quqyq buzýshy úsh táýlikke deiin ákimshilik qamaýǵa alynýy múmkin. Sonymen qatar samokat arnaiy aiyp turaǵyna qoiylady.
Jańa talaptardyń basty maqsaty – jaiaý júrginshilerdiń qaýipsizdigin qamtamasyz etý jáne jol qozǵalysy mádenietin arttyrý.
