Qazaqstannyń 17 qalasyndaǵy zańsyz qumar oiyn mekemelerin óz baqylaýynda ustap kelgen AQSh, Ispaniia, Nepal, Bolgariia, Resei jáne Qyrǵyzstan azamattarynan quralǵan uiymdasqan qylmystyq toptar ustaldy. Bul týraly QR Ishki ister ministrliginiń baspasóz qyzmetinen málim etti, ep habarlaidy "Ult aqparat".
«Ótken jyly politsiianyń aýmaqtyq departamentterine jáne IIM-ge azamattardan ruqsat etilgen bingo-klýbtarda qumar oiyndardyń (onlain kazino, elektrondy rýletka, poker jáne t.b.) oinalatyny týraly 70 aryz kelip tústi», - delingen ministrlik habarlamasynda.
Málim etilgendei, byltyr elimizdiń 17 qalasynda ornalasqan zańsyz qumar oiyn mekemelerine baqylaý júrgizip kelgen birneshe transulttyq uiymdasqan qylmystyq top quryqtaldy.
«2018 jyly IIM-niń arnaiy toby Bas prokýratýranyń kómegimen respýblika boiynsha 5 aýqymdy shuǵyl-tergeý sharalaryn ótkizdi. Nátijesinde 17 qalada 48 zańsyz qumar oiyn mekemesin óz baqylaýlarynda ustap kelgen 4 transulttyq uiymdasqan qylmystyq top ustaldy («Bingo Bým», «Mister Bingo», «Zodiak», «Imperial», «Roial VIP»). Is materialdary sotqa berildi jáne osy ýaqytta is Astana qalasynyń Qylmystyq ister jónindegi mamandandyrylǵan aýdanaralyq sotynda qaralýda.
Qylmystyq toptyń uiymdastyrýshylary jáne basshylary AQSh, Ispaniia, Nepal, Bolgariia, Resei jáne Qyrǵyzstan azamattary bolyp tabylady. Barlyq sheteldik azamattyń tulǵasy anyqtaldy. Olardyń ekeýi ustaldy, altaýy halyqaralyq izdeýge jariialandy», - dep atap ótti ministrlikten.
Is boiynsha kúdikti retinde 40-tan astam adam ótýde. Onyń 9-yna qatysty «qamaýǵa alý» túrindegi bultartpaý sharasy qabyldandy.
«2012 jyldan bastap tek «Imperial» klýb jelisiniń kirisi 7,5 mlrd teńgeden astam somaǵa jetse, «Mister Bingo» jelisi - 3,5 mlrd teńge, «Zodiak» jelisi 1,1 mlrd teńge kiris tapqan. Qumar oiyndar mekemeleriniń qylmystyq áreketinen túsken tabys túgeldei derlik jolǵa qoiylǵan arnalar boiynsha shet memleketterge aýdarylyp otyrǵan», - delingen baspasóz habarlamasynda.
Politsiianyń habarlaýynsha, ruqsat etilgen bingo-klýbtar retinde tirkelip, qumar oiyn oinalatyn bul mekemelerde adamdar iri aqshalarynan aiyrylyp jatady. Tipti, oiynshylar aqshany qaryzǵa nemese nesie túrinde alyp, aqshalai quldyqqa odan ary matala beredi eken.
«Keide aqshasynan aiyrylyp qalǵandardyń qylmysqa baryp jatatyny da belgili. Máselen, sońǵy 2 jylda Astana qalasynda ǵana oiyn oryndarynan turaqty túrde shyqpaityn klientter 14 oiyn ornynda 27 qylmys (1 kisi óltirý jaǵdaiy, 22 urlyq, 2 tonaý, 2 qaraqshylyq) jasaǵan», - dedi vedomstvodan.
