Sońǵy 2-3 jylda transshekaralyq ózender sýynyń azaiýy baiqalady. Bul týraly «Habar 24» telearnasynyń «Kún tártibi» baǵdarlamasynda QR Ekologiia, geologiia jáne tabiǵi resýrstar ministrligi Transshekaralyq ózender departamentiniń direktory Arsen Jaqanbaev aitty, dep habarlaidy QazAqparat.
«Transshekaralyq ózendermen sýdyń az aǵyp kelýin sońǵy 2-3 jylda baiqap otyrmyz. Eń aldymen bul - tabiǵi qubylys. Qazirgi ýaqytta álemdegi problema klimattyń ózgerýi bolyp tur. Iaǵni, kún jylynyp qurǵaqshylyq oryn alýda. Ekinshiden, ár memlekettiń turǵylyqty turǵyndarynyń damýy, ósýi bar. Soǵan orai sýdy tutyný kólemi artyp keledi», - dedi ol.
Osy rette ol Reseiden keletin Jaiyq ózeni sýynyń sońǵy 2-3 jylda azaiyp ketýi elimizdiń Batys óńirine zardabyn tigizip otyrǵanyn aitty.
«Resei tarapymen birneshe kelissóz júrgizgen edik. Olar sýdy eń aldymen óz qajetine paidalanady. Biz sýdyń tómengi saǵasynda otyrǵandyqtan olar paidalanǵannan qalǵan sýdy qoldanamyz. Jalpy, ár memleketpen transshekaralyq ózendi paidalanýǵa qatysty kelisim bar. Máselen, Reseimen 2013 jyly bekitilgen kelisim bar. Sol kelisimniń aiasynda ár ózen boiynsha 6 jumys toby qurylǵan. Aitalyq, Jaiyq pen Tobyl ózeni 1996 jylǵy hattamamen retteledi. Sol qujatqa sáikes sý az, ortasha jáne kóp jyldary ózimizge kerekti sý mólsherin alamyz. Biraq Jaiyq ózeniniń ózindik sipattamasy bar. Jaiyqtyń sý az tsikli óte uzaq bolady. Ol 5-6 jylǵa sozylýy múmkin. Sonyń saldary bizdiń ekologiiamyzǵa tiedi», - dedi Arsen Jaqanbaev.
