Finliandiia astanasy Helsinki qalasynda Resei jáne AQSh basshylary sońǵy toǵyz jyldan soń alǵash ret resmi túrde kezdesti. Kezdesý belgilengen ýaqytynan 1 saǵatqa kesh bastaldy. Sammit Prezident saraiynda ótip jatyr. Tramp pen Pýtindi Finliandiia prezidenti Saýli Niiniste qarsy aldy, dep habarlaidy «QazAqparat» halyqaralyq buqaralyq aqparat quraldaryna silteme jasap.
Vladimir Pýtin amerikalyq áriptesi Donald Tramppen kezdesýge qýanyshty ekenin, onymen RF-AQSh qatynastaryn jáne álemdik problemalardy talqylaý nietin bildirdi.
«Biz turaqty bailanysty jalǵastyryp kelemiz. Telefon arqyly sóilestik jáne túrli halyqaralyq sharalar alańynda birneshe ret kezdestik. Árine, bizdiń ekijaqty qarym-qatynastarymyz týraly jáne álemdegi kóptegen túiitkildi jaittar boiynsha egjei-tegjeili áńgimelesýdiń ýaqyty jetti», - dedi Resei prezidenti.
Ol amerikalyq áriptesin «qonaqjai Finliandiia jerinde» kórgenine qýanyshty ekenin aitty. Kezdesýde aldymen Pýtin sóz bastady, biraq jýrnalisterdiń aldynda nebári birer aýyz sózben shekteldi, dep habarlaidy TASS.
USA TODAY-diń aqparatyna súiensek, AQSh prezidenti Donald Tramp fototilshiler úshin arnaiy uiymdastyrylatyn dástúrli qol alysý kezinde reseilik áriptesine «saýda, iadrolyq qarýdan Qytaiǵa deiingi barlyq máselelerdi» talqylaýǵa daiyn ekenin málimdedi.
Prezident Tramp «búkil álem Amerika men Reseidiń araqatynasy jaqsy bolýyn qalaitynyn» bildirdi.
Kezdesý Vladimir Pýtinniń Máskeýde kidirip qalýyna bailanysty belgilengen ýaqytynan bir saǵattai kesh bastaldy.
Fin prezidenttik saraiyndaǵy kezdesýde Tramp Reseide ótken fýtboldan Álem chempionatyn maqtap, onyń «barlyq álem chempionattarynyń ishindegi úzdigi» bolǵanyn aitty.
AQSh prezidenti Resei basshysyna amerikan-resei qarym-qatynastaryn jaqsartýdyń múmkindikterin kórip otyrǵanyn málimdedi, dep habarlaidy TASS.
«Eki eldiń birlese áreket etýge zor múmkindikteri bar. (...) Barshamyzdy tolǵandyratyn máseleler kóp, men olarǵa jaýap tabamyz dep úmittenemin. Eń mańyzdysy - osy», - dedi Tramp.
«Aqyr aiaǵynda bizdiń qatynastarymyz airyqsha bolady dep oilaimyn», - dedi AQSh prezidenti.
Vashington ákimshiliginiń basshysy únemi «tatý bolǵan jaqsy» ekenin aitatynyn taǵy bir ret eske saldy.
Tramp tatýlastyqqa Máskeý men Vashington ǵana emes, búkil álem umtylatynyn aitty.
«Bizdiń tatýlasqanymyzdy búkil álem qalap otyr dep oilaimyn», - dedi ol.
«Bizdiń elder - eki jetekshi iadrolyq derjava. Olardyń úlesine iadrolyq qarýdyń 90% tiesili, bul jaqsy emes - jaman», - dedi Tramp.
Resei jáne AQSh prezidentteriniń kelissózderi birneshe saǵatqa sozylady, sodan keiin olar baspasóz aldyna shyǵady.
USA TODAY-diń habarlaýynsha, tańerteń Tramp AQSh jáne Resei qarym-qatynastary eshqashan qazirgidei tómengi deńgeide bolmaǵanyn aitqan. AQSh prezidenti Helsinkige jeksenbi kúni kelgen.
