AQSh prezidenti Donald Tramp 10 mamyrda Aq úide Resei syrtqy ister ministri Sergei Lavrovpen kezdesip, Siriia daǵdarysyn jáne basqa halyqaralyq máselelerdi talqylaidy, - dep habarlady 9 mamyrda Aq úi ókilderi. Donald Tramp qyzmetine kirisken qańtar aiynan beri Resei biligi ókilimen birinshi ret kezdeseiin dep otyr.
Tramp Lavrovpen 10 mamyrda Lavrov pen AQSh memlekettik hatshysy Reks Tillersonnyń kezdesýinen soń kelissóz júrgizedi dep josparlanǵan. Aq úi ókilderiniń aqparatyna qaraǵanda, kelissózde Siriia daǵdarysy, amerika-resei qarym-qatynasy jáne basqa da álemdik máseleler talqylanbaq.
Tramp sailaýaldy kampaniiasy kezinde Reseimen qarym-qatynasty jaqsartý qajetin aitqan. Biraq qyzmetine kirisken soń respýblikashyldarǵa tán barynsha dástúrli kózqarastardy ustana bastady. Ol NATO-nyń Reseidiń Eýropadaǵy agressiiasy men áskeri áleýetin arttyrýyna qarsy sharalaryn qoldaǵan.
Siriia daǵdarysyna qatysty ustanymda kelispeýshilikter bar ekenine qaramastan, Siriia taqyryby Kreml pen Tramp ákimshiligi "Islam memlketi" (IM) ekstremistik uiymy jáne basqa da ekstremistik toptarmen birlese kúresý múmkindikterin qarastyra alatyn sala bolyp otyr.
Lavrov Vashingtonǵa 2013 jyldan beri birinshi ret baraiyn dep otyr. Ol AQSh-qa ótken aptada Astanada Iran jáne Túrkiiamen jasasqan Siriiadaǵy qaqtyǵysty retteý jónindegi kelisim jospary boiynsha barmaq.
