AQSh Prezidenti Donald Tramp Siriianyń ońtústik-batysynda kúshine engen deeskalatsiia aimaǵyn qurý týraly kelisimniń saqtalyp jatqandyǵyn málim etti, dep habarlaidy QazAqparat "Lenta.ru"-ǵa silteme jasap.
«Atysty toqtatý týraly siriialyq kelisim saqtalyp otyrǵan syndy. Kóptegen ómirler saqtalýy múmkin. Kezdesýdiń nátijesi. Jaqsy!», - dep jazdy Tramp Tvitterde.
Buǵan deiin habarlaǵanymyzdai, 8 shilde kúni Gambýrgte ótken G20 sammiti sheńberinde RF Prezidenti Vladimir Pýtin AQSh Prezidenti Donald Tramppen Ýkraina men Siriiadaǵy jaǵdaidy, sondai-aq terrorizmmen, kiberqylmyspen kúres jáne kiberqaýipsizdik máselelerin talqylaǵan bolatyn.
Resei men AQSh kóshbasshylarynyń áńgimesi 2 saǵat 15 minýtqa sozyldy. Bul prezidentterdiń alǵashqy jeke kezdesýi, buǵan deiin olar tek telefon arqyly áńgimelesken.
Eske salsaq, 4 mamyr kúni Siriia máselesin retteý jónindegi Astana protsesi barysynda kepilger elder Resei, Iran jáne Túrkiia Siriia aýmaǵynda tórt deeskalatsiia aimaǵyn qurý týraly ýaǵdalasty. Naqtyraq aitqanda, Latakiia provintsiiasynyń jekelegen aimaqtarynda, Alepponyń birqatar óńirlerinde, Hama provintsiiasynda, Homs, Damask/Shyǵys Gýta provintsiialarynyń jekelegen bólikterinde jáne Deraa men Kýneitranyń birqatar aýmaqtaryn qamtityn óńirlerde qaýipsizdik aimaǵyn qalyptastyrý týraly memorandýmǵa qol qoiyldy.
4-5 shilde kúni elordada Siriia boiynsha kelissózderdiń kezekti raýndy ótti. Joǵary deńgeidegi 5-shi halyqaralyq kezdesýdiń qorytyndysy boiynsha kepilger elder Resei, Túrkiia jáne Iran birlesken málimdeme qabyldady.
«Janjaldy BUU Qaýipsizdik Keńesiniń 2254-qararyn oryndaý negizinde saiasi jolmen ǵana sheshýge bolady», - delingen málimdemede.
Sonymen qatar kepilger elder Siriiadaǵy zorlyq-zombylyqtyń aitarlyqtai tómendegendigin quptaityndyǵyn jáne taraptardy soǵysty toqtatý rejimin saqtaýǵa shaqyratyndyǵy aitylǵan.
«Deeskalatsiia aýmaǵy shekarasyn anyqtaýdaǵy progreske qanaǵattanýshylyq tanytamyz jáne birlesken jumys tobyna barlyq deeskalatsiia aimaqtarynyń operatsiialyq jáne tehnikalyq sharttaryn sońyna deiin jasaýdy tapsyrdyq», - delingen QR Syrtqy ister ministri Qairat Ábdirahmanov oqyp bergen birlesken málimdemede.
Birlesken jumys tobynyń kelesi otyrysy 1-2 tamyz aralyǵynda Iranda ótetin bolady.
