Beisenbi, 26 qarashada Donald Tramp Djo Baidenniń jeńgeni resmi túrde rastalǵannan keiin Aq úiden ketýge daiyn ekenin alǵash ret málimdedi.
"Árine, ketemin jáne solai isteitinimdi ózderińiz de keremet bilip otyrsyzdar. Jeńilisti moiyndaý ońai emes, jappai alaiaqtyq bolǵanyn da bilemiz" dedi ol.
Osyǵan deiin sailaý kezinde "daýys urlandy" jáne "sailaý erejesi buzyldy" dep málimdegen Tramp shtaby aryz túsirgen birneshe shtattyń soty shaǵymdardy keri qaitarǵan edi. Tramp shtaby áli de sailaý nátijesin daýlap jatyr.
Amerika baspasózi buǵan deiin prezident merzimin aiaqtaǵannan keiin Donald Tramp Aq úiden kete me, joq pa degen máseleni kóterip, ony synaǵan. Al Tramptyń ózi eshqashan ketpeimin dep aitqan emes. Biraq ol sailaý nátijesin de moiyndaýǵa daiyn emes. Onyń sózine qaraǵanda, sailaýshylar alqasy jinalyp, sailaýdyń túpkilikti nátijesin kýálik etkenge deiin "áli kóp ýaqyt bar". Sailaýshylar alqasynyń jiyny 14 jeltoqsanda ótedi.
Aldyn ala málimet boiynsha, Baiden sailaýshylar alqasynyń - 306, Tramp 232 daýysyna ie bolǵan. Sailaý jeńimpazy ataný úshin kandidatta sailaýshylar alqasynyń keminde 270 daýysy bolýy kerek.
