AQSh prezidenti Donald Tramp 17 qańtarda Reseidiń halyqaralyq sanktsiiany buza otyryp, Soltústik Koreiany kerek-jaraqpen qamtamasyz etip otyrǵanyn jáne Pheniannyń AQSh territoriiasyna jetetin zymyran jasap bolyp qalǵanyn málimdedi. Bul týraly Azattyq habarlady.
«Resei Soltústik Koreia máselesinde bizge múldem kómektespei otyr» dedi Tramp Reuters agenttigine suhbatynda. «Qytaidyń bizge kómektesip jatqan nársesine Resei qastyq qylyp otyr, bylaisha aitqanda, Resei Qytai jasap otyrǵan jumystyń esesin qaitaryp jatyr» dedi Tramp.
Resei men Qytai BUU Qaýipsizdik keńesiniń Soltústik Koreiaǵa qarsy ótken jyly qabyldaǵan sońǵy sanktsiiasyn qoldaǵan bolatyn. Ol sanktsiialar boiynsha Soltústik Koreiaǵa janarmai jetkizý shekteletin bolǵan. Jeltoqsanda Eýropa elderiniń arnaiy qyzmetteri Resei sanktsiiany buzyp, Phenianǵa keminde úsh ret janarmai jetkizgenin habarlaǵan. Biraq Máskeý muny joqqa shyǵarǵan.
Donald Tramp suhbatynda Soltústik Koreiany basty halyqaralyq problema dep atady. Ol Soltústik Koreia basshysy Kim Chen Ynmen kelissóz júrgizýdiń paidaly bolaryna kúmán keltirdi. Tramp buǵan deiin Kim Chen Ynmen tikelei kelissóz júrgizýge múmkindik baryn bildirgen bolatyn.
«Onymen kelissóz júrgize alamyn, biraq munyń problemany sheshetinine senbeimin» degen Tramp buǵan deiingi AQSh prezidentteri Soltústik Koreiany iadrolyq jáne zymyran baǵdarlamasyn damytýdan bas tartqyza almaǵanyn aitty. Tramp Phenianmen máseleni «beibit jolmen» sheshýden úmitti ekenin bildirdi.
AQSh prezidenti Qytaidyń Soltústik Koreiaǵa munai men kómir jetkizýdi shekteýine joǵary baǵa berdi. Degenmen ol Pekin Pheniannyń zymyran jáne iadrolyq baǵdarlamasyn tejeýde budan da kóp jumys isteýi keregin eskertti.
