Resei Prezidenti Vladimir Pýtinniń kómekshisi Iýrii Ýshakov AQSh Prezidenti Donald Tramp Resei Prezidentin AQSh-qa saparlap qaitýǵa shaqyrǵanyn habarlady, dep jazady Azattyq.
Ýshakovtyń 2 sáýir kúni reseilik aqparat agenttikterine habarlaýynsha, Tramp Pýtindi onymen naýryz aiynda telefonmen sóilesken kezinde shaqyrǵan.
Tramp pen Pýtinniń júzbe-júz kezdesý múmkindigin talqylaǵanyn Aq úi de rastady. Aq úidiń baspasóz hatshysy Sara Sanders Tramp 20 naýryzda Pýtinmen telefonmen sóileskeninde Aq úige saparlaý jaiyn talqylaǵanyn aitty.
"Prezident Tramp 20 naýryzda Pýtinmen telefonmen sóilesken soń onymen "tym jaqyn ýaqytta" belgili bir jerde, onyń ishinde Aq úide ekeýara kezdesý jaiyn talqylaǵanyn rastady" dedi Sanders.
Tramp pen Pýtin telefonmen amerikalyq taraptyń bastamasymen sóilesken. Ol kezde Tramp Pýtindi prezident bolyp sailanýymen quttyqtaǵan. Washington Post Aq úi Trampty Pýtindi quttyqtamaýǵa shaqyrǵanyn jáne áńgimeni Ulybritaniiada ýlanǵan Resei syrtqy barlaý qyzmetiniń burynǵy ofitseri Sergei Skripaldiń isin talqylaýdan bastaýǵa keńes bergenin habarlaǵan. AQSh prezidenti ol kezde Twitter-de Reseimen qarym-qatynas ornatý "jaqsy" ekenin jazǵan.
26 naýryzda Vashington Sergei Skripal men qyzy Iýliia Skripaldiń ýlanýyna jaýap retinde reseilik 60 diplomatty elden shyǵaryp, Sietldegi Resei konsýldyǵyn jabýǵa sheshim qabyldaǵan. Máskeý buǵan jaýap retinde amerikalyq 60 diplomatty elden shyǵaryp, Sankt-Peterbýrgtegi konsýldyqty japqan.
