AQSh pen Qytai saýda kelisimi boiynsha kelissózdiń alǵashqy kezeńin sátti aiaqtady. Sol sebepti 15 jeltoqsannan bastap qytai taýarlaryna baj salyǵyn kóbeitý týraly buryn qabyldanǵan sheshim kúshine enbeidi. AQSh Prezidenti Donald Tramptyń Twitter-de jazýynsha, Qytai kóptegen qurylymdyq ózgerister jasaýǵa jáne Amerikanyń aýyl sharýashylyǵy jáne ónerkásiptik taýarlaryn iri kólemde satyp alýǵa kelisken.
Prezident sonymen birge birqatar qytai taýarlaryna importtyq baj salyǵynyń eki esege azaiatynyn aitty. Tramptyń aitýynsha, Qytai 2020 jyly 50 milliard dollarǵa Amerikanyń aýyl sharýashylyǵy ónimderin satyp alýǵa kelisken. Bul eki ese joǵary kórsetkish. Pekin resmi túrde bul aqparatty rastamady, tek kelissózdiń alǵashqy kezeńiniń aiaqtalǵanyn aitty. Qytai ókilderi 15 jeltoqsannan bastap Amerika taýarlaryna shekteý qoimaitynyn málimdedi.
AQSh pen Qytai arasynda saýda kelisimi boiynsha kelissóz bir jyldan astam ýaqyttan beri júrgizilip keledi. Buǵan deiin Tramp eger eki memleket arasynda saýda júrgizý sharttary ózgermese, qytai taýarlaryna baj salyǵy birtindep kóbeiedi dep aitqan. AQSh birinshi kezekte saýda-sattyqtaǵy tepe-teńdiktiń joqtyǵy men ziiatkerlik menshik quqyǵy máselesine alańdap otyr. Qalǵan máseleler saýda kelisiminiń ekinshi kezeńinde talqylanady. Tramptyń aitýynsha, ekinshi kezeń bastalyp ta ketken.
