AQSh prezidenti Donald Tramp tólem júiesine arnalǵan segiz qosymshany ázirlep shyǵarǵan jáne olardy baqylaityn Qytai kompaniialarymen qarjy operatsiialaryn jasaýǵa tyiym saldy. Bul týraly jarlyqqa ol 5 qańtarda qol qoiǵan dep jazdy Reuters.
Jarlyqqa sáikes, Qytaidyń Alipay, WeChatPay, QQWallet pen Tencent QQ, Camscanner, SHAREit, Vmate jáne WPS Office qosymshalaryna tyiym salyndy. Aq úi ákimshiliginiń pikirinshe, Qytai biligi osy baǵdarlamalardyń kómegimen amerikalyq memlekettik qyzmetkerlerdiń jeke derekterin qolǵa túsirip, eldiń ulttyq qaýipsizdigine qater tóndirýi múmkin.
Jarlyq prezident qol qoiǵannan keiin 45 kúnnen soń, iaǵni Donald Tramp prezidenttikten ketken soń kúshine enedi. Tramp ózinen keiin bilikke keletin saiasi básekelesi Djo Baidendi Qytaiǵa kózqarasy tym jumsaq dep jii synap júr.
Qytai syrtqy ister ministrligi Tramptyń jarlyǵyn "AQSh-tyń qorqytyp-úrkitý, óktemdik tanytýynyń mysaly" dep atap, Pekinniń buǵan jaýap retinde tiisti shara qabyldaitynyn aitty.
