AQSh prezidenti Irandy AQSh jáne amerikalyqtarǵa qarsy baǵyttalǵan is-áreketten aýlaq bolýǵa shaqyrdy. Donald Tramp óziniń Twitter paraqshasynda osylai dep málimdedi, dep habarlaidy QazAqparat.
Senbi kúni Amerika Prezidenti óziniń akkaýntynda «Iran áskeri qolbasshy Kasem Súleimanidiń ólimi úshin AQSh-tyń belgili bir nysandaryna soqqy jasaý týraly óte batyl aityp otyrǵanyn» sóz etti.
«Iran AQSh-tyń keibir nysandaryna shabýyl jasaityny týraly ashyq aityp jatyr. Olar bizden álemdi terroristen qutqarǵanymyz úshin kek alǵysy keledi. Ol [general Kasem Sýleimani] basqa adamdardy aitpaǵanda buǵan deiin amerikalyq sarbazdy óltirip, óte kóp adamdy jaralady. Onyń qolynan zardap shekkender arasynda sherýge shyqqandar da bar.
Uzaq jyldar boiy Iran qiyndyq týǵyzyp keldi. Bul eskertý bolsyn. Eger Iran amerikalyqtardy nemese amerikalyq nysandardy atqylaityn bolsa, biz de qazirden bastap Irandaǵy 52 nysandy kózdep otyrmyz (bul nysandar Irannyń kóp jyl buryn tutqynǵa alǵan 52 amerikalyqty bildiredi). Ol nysandardyń keibireýi - Iran úshin, Iran mádenieti úshin asa mańyzdy. Soqqy osy nysanalardy jáne Irandy kózdeidi, bul óte jyldam jáne óte kúshti soqqy bolady. AQSh qorqytyp-úrkitýge endi shydamaidy!», - dep jazdy AQSh prezidenti.
Eske sala keteiik, eki kún buryn Baǵdat halyqaralyq áýejaiyna jasalǵan raketa shabýylynan 8 adam kóz jumdy. Raketalar «Al-Hashd ash-Shaabi» shiit jasaǵyna qarsy baǵyttalǵan bolatyn. Keiinnen bul amerikalyq Pentagonnyń operatsiiasy ekeni belgili boldy.
Aita keteiik, raketa shabýylynan qaza tapqandar arasynda irandyq Islam revoliýtsiiasy áskerleri korpýsynyń arnaiy maqsattaǵy «Al Kýds» qarýly kúshteriniń qolbasshysy Kasem Súleimani de bar.
Osy jaǵdaidan keiin munaidyń álemdik naryqtaǵy baǵasy qymbattady.
