AQSh prezidenti Donald Tramp koronavirýs indetine bailanysty immigratsiiany ýaqytsha toqtatý týraly jarlyqqa qol qoidy. Prezident jumys oryndaryn saqtap, meditsinalyq resýrsty únemdeý úshin osyndai sheshim qabyldaǵanyn aitty.
"Ekonomikamyz qalpyna kele bastaǵan sátte jumyssyz amerikalyqtar jumys oryndaryna kezekke birinshi bolyp turady, bul soǵan kepildik bolady" dedi Tramp.
Buǵan deiin Tramp jarlyq 60 kúnge deiin kúshinde bolady, qajet bolǵan jaǵdaida uzartylady dep málimdegen.
Jarlyq 24 sáýir túnde kúshine enedi jáne AQSh aýmaǵynan tys jerde turyp jatqan viza alyp úlgermegen shetel azamattaryna qatysty. Tek meditsina qyzmetkerleri men AQSh azamattarynyń týystaryna elge kirýge ruqsat berilýi múmkin.
AQSh-ta immigratsiia máselesi federaldyq zańmen rettelgendikten prezidenttiń immigranttardyń elge kirýin toqtatý talpynysy sotta qaralýy múmkin.
Koronavirýs juqtyrǵandar sany boiynsha AQSh álemde birinshi orynda tur. Munda 840 myńǵa jýyq adamnan koronavirýs tabylǵan, 46 myńnan astam adam qaitys bolǵan.
