AQSh prezidenti Donald Tramp óziniń ulttyq qaýipsizdik máseleleri jónindegi burynǵy keńesshisi Maikl Flinge "raqymshylyq jariialady". Prezident bul jaiynda Twitter-degi paraqshasynda jazdy.
2017 jyly Maikl Flinn 2016 jylǵy qarashadaǵy AQSh prezidenti sailaýy men onda jeńiske jetken Donald Tramptyń 2017 jyly qańtarda ótken inaýgýratsiiasyna deiingi kezeńde Reseidiń AQSh-taǵy elshisi Sergei Kisliakpen bailanystary týraly basshylyqty habardar etpegeni úshin AQSh prezidentiniń ulttyq qaýipsizdik jónindegi keńesshisi qyzmetinen ketýgemájbúr bolǵan. Ol ótpeli kezeńde Resei elshisimen bailanystary jóninde AQSh Federaldyq tergeý biýrosyna (FBR) jalǵan málimet bergenin moiyndaǵan bolatyn. Sol úshin onyń ústinen qylmystyq is qozǵalyp, túrme jazasyn alý qaýpi týyndaǵan.
Alaida AQSh-tyń arnaiy prokýrory Robert Miýller sottan oǵan bas bostandyǵyn aiyrý jazasyn bermeýdi ótingen. Aiyptaý tarabynyń aitýynsha, Flinn Reseidiń AQSh-taǵy sailaýǵa kiligýi týraly qundy aqparat bergen. Arnaiy prokýror bergen qujatta Flinnen 19 ret jaýap alynǵany jazylǵan.
Bastapqyda Flinn taǵylǵan aiyptardy moiyndap, tergeý organdarymen birlesip áreket etken, alaida keiinirek advokatyn aýystyryp, aiyptardan bas tartty.
Biyl ádilet ministrligi Flinge taǵylǵan aiyptardy alyp tastaǵan. Vedomstvo FBR júrgizgen tergeý amaldarynyń "barlaý qyzmeti málimetterimen" sáikes emestigin alǵa tartqan. Alaida sot sol kúii aiaqtalmaǵan edi.
AQSh tergeý oryndary sonymen birge Flinniń sailaýǵa deiingi iskerlik belsendiligine de nazar aýdarǵan. Mysaly, Flinn reseilik Russia Today arnasynyń 10 jyldyǵyn atap ótý sharasyna qatysyp, Resei basshysy Vladimir Pýtinmen qatar otyrǵan.
Washington Post gazetine bergen suhbatynda Flinn Pýtinmen aitarlyqtai mańyzdy eshnárse jaily sóilespegenin, tek ózin qysqasha tanystyrǵanyn aitqan. General sonymen birge amerikalyq jýrnalisterge Russia Today-den "aqyl-keńes aitqany úshin" qarjylai syiaqy alǵanyn da aitqan.
Reseidiń AQSh-taǵy sailaýǵa aralasý isi boiynsha osyǵan deiin Tramptyń qaramaǵynda istegen birqatar qyzmetkerler jaýapqa tartylǵan, biraq olardyń eshqaisysyna Reseimen astyrtyn sóz bailasty degen aiyp taǵylmady.
