AQSh prezidenti Donald Tramp 18 qańtarda Shengen aýmaǵyndaǵy elder men Ulybritaniia, Irlandiia, Braziliiadan keletin jolaýshylardyń koronavirýsqa bailanysty elge kirýine shekteý qoiatyn erejeniń kúshin joidy. Tramp jarlyǵyna sáikes, 26 qańtardan bastap Eýropadan AQSh-qa sapar shegetinderdiń qolynda koronavirýs juqpaǵanyn dáleldeitin anyqtama bolýy tiis. Biraq Iran men Qytaidan keletinderge qoiylǵan shekteý kúshinde qalǵan. Tramp jarlyǵynda bul elderdiń densaýlyq saqtaý salasynda aqparat almasýdan bas tartqany jazylǵan.
20 qańtarda ókiletine kirisetin AQSh-tyń jańadan sailanǵan prezidenti Djo Baidenniń baspasóz hatshysy Djen Psaki jańa ákimshilik shekteýdi kúshinde qaldyratynyn aitty. Psakidiń sózine qaraǵanda, ákimshilik kerisinshe halyqaralyq saparlarǵa shekteýdi kúsheitýdi josparlap otyr.
Byltyr jyl basynda Qytaidyń Ýhan qalasynda alǵash koronavirýs indeti órshi bastaǵanda Tramp túrli memleket jolaýshylarynyń elge kirýine shekteý qoiǵan. Bastapqyda Qytaidan keletinderge tyiym salyndy. Keiinirek shekteýge Iran da ilindi. Naýryz aiynda Tramp Shengen aýmaǵyndaǵy elderden keletin jolaýshylardyń elge kirýin shektedi. Keiirinek ereje Irlandiia, Ulybritaniia, Braziliiadan keletinderge taraldy.
AQSh koronavirýstyń taraýy jóninen álemde birinshi orynda tur. Munda 24 millionnan astam adam koronavirýsqa shaldyqqan. 400 myńnan astamy qaitys bolǵan.
