AQSh prezidenti Donald Tramp ákimshiligi sailaýdan beri úsh apta ótken kezde Djo Baiden komandasyna bilikti tapsyrýǵa kelisti. Tramp sailaýda jeńilgenin moiyndaǵan joq, biraq federaldyq agenttiktiń bilik tranzitin bastaý týraly sheshimimen kelisetinin aitty.
Osyǵan deiin jalpy qyzmet ákimshiliginiń (General Services Administration) jetekshisi Emili Merfi 20 qańtarda inaýgýratsiiasy ótetin Baidenge bilik tapsyrý protsesin resmi túrde bastai berýge bolatynyn eskertken.
“Memlekettiń múddesi úshin Emili jáne onyń komandasyna bastapqy protokolǵa sáikes atqarylýy tiis sharalardy júzege asyrýǵa keńes beremin jáne ózimniń komandama da sony aittym” dep jazdy Tramp Twitter jelisinde.
Jalpy qyzmet ákimshiliginiń qadamy Baiden komandasyna federaldyq agenttikterdiń aqparatyna qol jetkizip, resmi tulǵalarmen bailanys ornatýǵa, bilik oidaǵydai aýysý úshin úkimetten qarjy alýǵa, ulttyq qaýipsizdik máseleleri boiynsha esepter tyńdaýǵa múmkindik beredi.
Bilik tranzitin bastaýdan bas tartyp kelgen Trampqa osyǵan deiin demokrattar men birqatar respýblikashyldar protsesti keshiktirmeý qajettigin meńzep, qysym jasaǵan. Bilik tranzitiniń keshigýi koronavirýs indetimen kúreske jáne ulttyq qaýipsizdik máselelerine teris yqpal etýi múmkin ekeni aitylǵan edi.
Baiden komandasy úkimettiń keshigip jetken kómegin jyly qabyldap, bul qadam "biliktiń beibit aýysýy úshin" óte mańyzdy ekenin aitqan.
