AQSh prezidenti Donald Tramp "Taliban" qozǵalysy jáne "Islam memleketi" ekstremistik uiymynyń Aýǵanstandaǵy kúshteri týraly málimdeme jasap, bul elde AQSh-tan basqa elder de soǵysa alatynyn aitty. Onyń pikirinshe, Aýǵanstandaǵy soǵys qimyldaryna Resei, Úndistan jáne Pákistan belsendi aralasýy kerek.
Úkimet otyrysynda sóilegen Tramp 1980 jyldary Aýǵanstandaǵy soǵys SSSR-dy "taqyrǵa otyrǵyzyp", ydyratqanyn aitty.
"Resei buryn SSSR bolatyn. Aýǵanstan ony Reseige ainaldyrdy, óitkeni Aýǵanstanda soǵysyp júrip bankrot boldy. Resei terrorshylar ózine qarai qozǵalǵan soń Aýǵanstanda soǵysty. Olardyń Aýǵanstanda soǵysýǵa haqy boldy. Taqyrǵa otyrǵan soń, qaitadan Resei dep atala bastady" dep málimdedi Tramp.
SSSR Aýǵanstanǵa 1979 jyly basyp, kirip 1989 jylǵa deiin sonda ásker ustady. Sovet áskeri modjahedtermen Kabýlge baqylaý úshin kúresti. On jyl boiy kóp shyǵanǵa batqan SSSR 1989 jyly Aýǵanstannan áskerin áketti. SSSR resmi túrde 1991 jyly 26 jeltoqsanda ydyrady.
AQSh prezidenti Donald Tramp Aýǵanstannan amerikalyq áskerilerdiń shyǵatyny týraly resmi málimdeme jasaǵan joq. AQSh bul elde 14 myńǵa jýyq ásker ustaidy.
