AQSh prezidenti Donald Tramp týý arqyly azamattyq alýdy shekteýge jáne «bosaný týrizmine» qarsy kúreske baǵyttalǵan eki jarlyqqa qol qoidy, dep habarlaidy ult.kz.
Birinshi jarlyqqa sáikes, shetel azamattarynyń AQSh-qa arnaiy bosaný úshin kelip, sábiine avtomatty túrde AQSh azamattyǵyn alyp berý tájiribesine tosqaýyl qoiylady. Bul shekteý osyndai maqsatta qoldanylatyn sýrrogat ana qyzmetine de qatysty.
Ekinshi jarlyq AQSh-ta dúniege kelgenimen, avtomatty túrde azamattyq ala almaityn balalardyń sanatyn keńeitedi. Buǵan deiin mundai shekteý diplomattar men halyqaralyq uiym qyzmetkerleriniń balalaryna ǵana qoldanylsa, endi AQSh «jaý memleketter» dep sanaityn elderdiń azamattarynyń jáne terroristik uiymdarmen bailanysy bar adamdardyń balalaryna da taralady.
Sonymen qatar Tramp Memlekettik departament pen Ishki qaýipsizdik ministrligine «bosaný týrizmi» shemalaryn anyqtap, olardyń jolyn kesýdi tapsyrdy.
Aq úidiń málimdeýinshe, mundai qyzmetter AQSh-tyń immigratsiialyq zańdaryn ainalyp ótýge múmkindik berip, álemniń ártúrli elderinde deldaldar úshin tabysty bizneske ainalǵan.
Alaida bul másele áli de quqyqtyq daýǵa ulasýy múmkin. Sebebi AQSh Konstitýtsiiasynyń 14-túzetýine sáikes, el aýmaǵynda dúniege kelgen jáne AQSh iýrisdiktsiiasyna jatatyn adamdarǵa azamattyq beriledi. Donald Tramp bul normany ózgertýge buǵan deiin de birneshe ret talpynys jasaǵan.
Eske salaiyq, biyl maýsym aiynda AQSh Joǵarǵy soty Tramptyń osyǵan uqsas alǵashqy jarlyǵynyń kúshine enýine tosqaýyl qoiǵan bolatyn. Sarapshylardyń pikirinshe, jańa jarlyqtar da sotta daýlanýy ábden múmkin.
