AQSh Ońtústik Koreiamen birlesken áskeri jattyǵý ótkizýdi toqtatady, - dep málimdedi AQSh prezidenti Donald Tramp. Singapýrde Soltústik Koreia basshysy Kim Chen Ynmen kezdesýiniń qortyndysy boiynsha ótken baspasóz máslihatynda Tramp Phenian iadrolyq qarýynan bas tartýǵa mindetteme alǵandyqtan, AQSh Soltústik Koreianyń qaýipsizdigine kepildik beretinin aitty.
Degenmen Tramp ázirge Ońtústik Koreiadaǵy amerikalyq áskeriler sanyn qysqartý jóninde áńgime bolmaitynyn aitty. Ol áskerilerdi azaitý bolashaqta júzege asatynynan úmittenedi.
Tramptyń sózinshe, Soltústik Koreiaǵa qarsy sanktsiia Vashington Pheniannyń iadrolyq arsenalyn joiý nietinen ainymaitynyna kóz jetkizgenge deiin kúshinde bolady.
Donald Tramp Kim Chen Yndy "talantty" basshy dep baǵalap, onyń eldi tym jas kezden basqaryp kele jatqanyn, sondyqtan memleket basqarý mindet ekenin aitty. Tramp Kimdi "júzi jyly adam" demegenin eskertip, Soltústik Koreiadaǵy adam quqyǵynyń jai-kúii jaqyn ýaqytta jaqsaratynynan úmitti ekenin aitty.
Donald Tramp buǵan qosa AQSh Soltústik Koreiamen jańasha qarym-qatynas ornatý umtyly baryn aitty. AQSh prezidenti 1950-jyldardaǵy Korei soǵysynda qurban bolǵandardy meńzep, ótken shaq bolashaqty baǵdarlamaýy tiis ekenin jetkizdi.
