AQSh prezidenti Donald Tramp eldegi jáne álemdegi saiasi jaǵdailarǵa qatysty joldaý jasady. Tramp eldiń ekonomikalyq jetistikterine toqtala kele, qos partiiany immigratsiia máselelerin retteý úshin ortaq sheshim qabyldaýǵa shaqyrdy, dep habarlaidy "Ult aqparat" centralasian.org agenttigine silteme jasap.
Ol bilikke kelgenine bir jyl ótken soń Kongrestiń birlesken otyrysynda baiandama jasady. Bir apta buryn qos partiianyń biýdjetke qatysty kelispeýshilikterine bailanysty federaldyq úkimet jumysy jartylai toqtaǵan edi.
AQSh prezidenti baiandamasynda Qytai men Reseidi "qarsylastar" dep atady. Sonymen birge ol Kongresti "Iranmen iadrolyq kelisimniń kemshilikterin retteýge" shaqyryp, AQSh Soltústik Koreianyń qarýlanýyna qarsy "meilinshe qysym kórsetý" naýqanyn jalǵastyra beretinin málimdedi.
Kóptegen máseleler boiynsha Tramp óz ákimshiliginiń ustanymyn taǵy rastady. Solardyń ishinde "Islam memleketi" jáne ""Ál Qaidaǵa" qarsy soǵysty jalǵastyrý, terrorizmge qarsy turý, AQSh saiasatyn qoldamaityn memleketterge kómekti azaitý máseleleri bar. Buǵan qosa ol Vashingtonnyń óz áskerin Aýǵanstannan jáne basqa da elderden shyǵarý merzimderin jariialamaitynyn málimdedi.
AQSh prezidenti bir jarym saǵatqa sozylǵan sózinde Kongresten infraqurylym nysandaryn modernizatsiialaýǵa 1,5 trillion dollar assignatsiialaýdy maquldaýyn surady. Ol Niý-Iorktegi Empire State kóp qabatty ǵimaraty ótken ǵasyrdyń alǵashqy jartysynda bir-aq jylda salynǵanyn aityp, «Bizdiń kezimizde jol salýǵa ruqsat alýdyń ózine 10 jyl ketirý degen masqara emes pe?» dedi.
Tramp baiandamasynyń syrtqy saiasat pen qorǵanysqa qatysty bóliminde eks-prezident Barak Obamanyń «asa qaýipti terrorshylar» otyratyn Gýantanamo túrmesin jabý týraly sheshimin joiǵanyn aitty. Ol sonymen qatar qorǵanys salasyna bólinetin biýdjet qarjysyn sekvestrden shyǵarýdy qoldaitynyn jetkizdi.
Tramptyń baiandamasy 1 saǵat 23 minýtqa sozyldy, ony birneshe márte qol shapalaqtaýmen bólip jiberip otyrdy.
Tikelei taratylymdy orys tilindegi ilespe aýdarmamen kórińiz.
