AQSh prezidenti Donald Tramp aýqymdy hakerlik shabýyl týraly alǵash ret pikir bildirdi. Osyǵan deiin eldiń memlekettik departamenti jáne kiber qaýipsizdik jónindegi mamandary shabýyldyń artynda Reseidiń barlaý qyzmeti tur degen. Tramp bul tujyrymǵa kúmán keltirip, shabýyldyń artynda Qytai úkimeti turýy múmkin dedi.
Tramp "hakerlik shyn ómirden góri baspasóz betterinde kóbirek kezdesedi" dep, jaǵdaidyń "baqylaýda" ekenin aitty.
"Resei, Resei, Resei – qandai da bir jaǵdai bolsa, báriniń aitatyny osy, óitkeni beldi basylymdar munyń Qytai bolýy múmkin ekenin talqylaýdan qorqady. Onyń negizgi sebebi qarjyda" dep jazdy Tramp Twitter jelisinde.
Aq úi basshysy sondai-aq sailaý kezinde daýys berý apparattaryna da hakerlik shabýyl jasalǵan bolýy múmkin dedi, onyń sailaýǵa yqpalyn meńzedi. Osy jazbasynda eldiń qazirgi prezidenti qarasha aiyndaǵy prezident sailaýynda "Men jeńdim" dep baiaǵy málimdemesin qaitalady.
Twitter jelisi Tramptyń bul jazbasyna "jalǵan aqparat" degen belgi qoiyp, sailaýdyń shynaiy jeńimpazy Djon Baiden ekenin, oǵan 306 elektordyń daýysy berilgenin, bul nátijeniń 14 jeltoqsanda bekitilgenin eskertti.
Beisenbi, 17 jeltoqsan kúni Donald Tramp ákimshiligi men jańa sailanǵan prezident Djo Baiden AQSh úkimetiniń kompiýterlik jelilerine aýqymdy hakerlik shabýyl jasaldy dep dabyl qaqty.
AQSh ishki qaýipsizdik departamentiniń kiber bólimi shabýyldyń "federaldy úkimetke, shtattardyń ákimshiligine, mýnitsipalitetterge, sondai-aq asa mańyzdy infraqurylym obektilerine jáne jeke sektordaǵy ózge de mekemelerge edáýir qater tóndiredi" dedi.
Shabýyldan zardap shekkender qatarynda AQSh Energetika, Qarjy jáne Saýda ministrlikteri jáne Microsoft kompaniiasy bar.
AQSh memlekettik hatshysy Maik Pompeo amerikalyq jýrnalist Mark Levinge berge suhbatynda shabýyldyń artynda Resei turǵanyn aitty.
