AQSh prezidenti Donald Tramp 5 aqpanda kongreste jasaǵan joldaýynda AQSh innovatsiia jaǵynan ózge elderdiń barlyǵyn basyp ozady dep málimdedi. Ol bul týraly Reseimen jasasqan qarý-jaraqqa baqylaý kelisiminen shyǵý týraly sheshimine bailanysty sózinde aitty.
Buǵan deiin Aq úi AQSh 2 aqpannan bastap orta jáne qysqa qashyqtyqqa ushatyn zymyrandardy joiý týraly 1987 jyly SSSR-men jasalǵan kelisimnen shyǵý protsesin bastaidy dep málimdegen. Máskeý buǵan jaýabynda Reseidiń de ol kelisimnen shyǵatynyn aitqan.
AQSh Reseidi 2014 jyly atalǵan kelisimdi buzdy dep aiyptaǵan. Resei ol aiyptaýdy birneshe ret joqqa shyǵarǵan. Álemdegi eń joiqyn qarý-jaraqtyń úlken qoryna ie qos memlekettiń bul málimdemeleri ekeýiniń ózara qarýlaný básekesine ulasyp ketpei me degen alańdaýshylyqqa sebep bolyp otyr.
Tramp joldaýynda AQSh-tyń zymyranǵa qarsy qazirgi zamanǵy eń ozyq qorǵanys júiesin ázirlep jatqanyn málimdedi.
"Biz kelisimdi buljytpai oryndap otyrǵan kezde Resei ony birneshe ret buzdy. Birneshe jyl boiy solai bolyp keldi" dedi ol. "Bálkim Qytai men ózge elderdi qosyp basqa kelisim jasaý jóninde kelissóz ótkizetin shyǵarmyz, eger olai bolmasa biz jumsaityn shyǵys pen innovatsiia jaǵynan barlyǵynan ozamyz" dedi Tramp.
Qanatty jáne ballistikalyq zymyrandarǵa tyiym salatyn kelisim qarý-jaraqty baqylaý salasyndaǵy negizgi qujat sanalady.
