AQSh prezidenti Donald Tramp Soltústik Koreia tarapynan jasalýy yqtimal "oisyz is-áreketke" qarsy AQSh armiiasy "saqadai sai tur" dep málimdedi. Twitter áleýmettik jelisindegi paraqshasynda Tramp Soltústik Koreia lideri Kim Chen Yn qazirgi baǵytynan bas tartar degen úmit bildirgen.
Buǵan deiin Soltústik Koreianyń memlekettik aqparat agenttigi AQSh basshysyn "shielenisti ýshyqtyryp otyr" dep aiyptaǵan.
Juma kúni Associated Press agenttigi AQSh pen Soltústik Koreianyń joǵary deńgeidegi ókilderi jasyryn diplomatiialyq bailanysqa shyqqany týraly habarlaǵan. Agenttiktiń derek kóziniń aitýynsha, AQSh-tyń Soltústik Koreia boiynsha arnaiy ókili men BUU janyndaǵy Soltústik Koreia missiiasy qyzmetkeriniń hat almasýy eki jaq arasyndaǵy shielenisti báseńsite almaǵanymen, mańyzdy kelissózder bastaýǵa negiz bola alady. Soltústik Koreia bul aqparatqa qatysty ázirshe túsinikteme bergen joq.
Sońǵy ýaqytta Vashington men Pheniannyń bir-biriniń atyna aitqan qatqyl málimdemeleri álemniń kóptegen elderiniń alańdaýshylyǵyn týǵyzǵan. Germaniia, Qytai jáne Resei eki tarapty sabyrǵa shaqyrǵan.
AQSh pen Ońtústik Koreia bolsa tamyzda keń kólemdi birlesken áskeri jattyǵý ótkizýge daiyndyqty jalǵastyra beretindigin málimdegen. Soltústik Koreia bul jattyǵýlardy "soǵysqa ázirlený" dep ataǵan edi.
Pheniannyń halyqaralyq "iadrolyq oqtumsyqty AQSh aýmaǵyna deiin jetkize alatyn" ballistikalyq zymyran synaqtaryn ótkizgeni úshin BUU Qaýipsizdik keńesi tamyzdyń 5-i kúni Soltústik Koreiaǵa qarsy sanktsiialardy kúsheitý týraly qarar qabyldaǵan. Phenian halyqaralyq qaýymdastyq talabyna moiynsunbai otyr.
