AQSh prezidenti Donald Tramptyń ákimshiligi Qytai kommýnistik partiiasynyń barlyq múshesine jáne olardyń otbasyna AQSh-qa kirýge tyiym salýdy qarastyryp otyr. Bul týraly New York Times basylymy jáne Reuters agenttigi habarlady óziniń derekkózine siltei otyryp. Eger tyiym salý týraly zań qabyldansa, Qytaidyń kemi 150 million turǵyny AQSh-qa bara almaidy.
Reuters agenttiginiń anonim derekkózi AQSh-taǵy joǵary laýazymdy sheneýnikterdiń prezidenttik jarlyq jobasyn ázirlep jatqanyn, ol jobanyń Tramptyń ózine áli kórsetilmegenin aitqan. Derekkóz qujattyń áli bastapqy kezeńinde ekenin habarlaǵan. Eger Qytai kommýnisterin AQSh vizasyn alý múmkindiginen aiyratyn zań qabyldanatyn bolsa, bul Vashingtonnyń Pekinge qarsy eń qatań sharasy bolýy múmkin.
2018 jyldyń basynda AQSh pen Qytai arasynda saýda soǵysy bastaldy. Ol kezde Tramp birqatar Qytai taýaryna baj salyǵyn kóbeitti. Vashington Pekinniń amerikalyq óndirýshilerge nuqsan keltirip jatqanyn málimdegen. Odan keiin AQSh Qytaida tehnologiiany urlady dep aiyptady. Qytai biligi balama jaýap qaitardy. Taraptar shielenistiń rettelgenin aitty, biraq naqty kelisimniń jasalýyna koronavirýs pandemiiasy kedergi keltirdi.
Aq úi Qytaidy epidemiianyń alǵashqy kezeńi týraly aqparatty jasyryp otyr dep kúdiktenedi. Vashington sondai-aq Pekindi Gonkong turǵyndarynyń quqyqtary men bostandyqtaryna qarsy saiasat júrgizip otyr dep aiyptaidy.
Qytai kommýnistik partiiasy - múshe sany boiynsha álemdegi eń iri partiia. Partiianyń 92 million múshesi bar. Onyń jarlyǵynda partiianyń marksizm-leninizm ideologiiasyna, Mao Tszedýnnyń, Den Siaopinniń jáne Si Tszinpinniń qytailyq ereksheligi bar sotsializm týraly ideialaryna súienetini jazylǵan.
Qytai syrtqy ister ministrliginiń resmi ókili Hýa Chýnin Aq úidiń júzege asýy múmkin jospary ras bolyp shyqsa, AQSh-tyń mundai qadamy "aianyshty" bolar edi dedi. AQSh memlekettik hatshysy Maik Pompeo jáne Aq úi baspasóz hatshysy tyiym salý týraly zańnyń bar-joǵy týraly eshnárse aitpady.
