AQSh prezidenti Donald Tramp 23 sáýir kúni Aq úide AQSh-qa úsh kúndik resmi saparmen barǵan Frantsiia prezidenti Emmanýel Makrondy qabyldady.
Emmanýel Makron men jubaiy Bridjit Makron Vashingtonǵa barǵan soń uzamai Donald Tramp pen onyń jubaiy Melaniia Tramppen birge Aq úidiń ońtústigindegi kógalǵa ózderi alyp kelgen syilyǵy - eýropalyq emen aǵashyn otyrǵyzdy. Aǵash Frantsiianyń Birinshi Dúniejúzilik soǵys jyldarynda 9 myńnan astam amerikalyq sarbaz qaza tapqan aýdanynan ákelingen.
Qos prezident budan soń jubailarymen birge Vashingtonnyń tarihi oryndarynyń ústinen tikushaqpen ekskýrsiia jasady.
24 sáýirde Tramp pen Makron resmi kelissóz ótkizedi. Kezdesýde Makron Trampty Iranmen jasalǵan iadrolyq kelisimnen shyqpaýǵa kóndirýge tyrysady. Iranmen arada 2015 jyly jasalǵan kelisimge AQSh, Frantsiia, Ulybritaniia, Germaniia, Resei jáne Qytai qol qoiǵan. Kelisimde Tegerannyń iadrolyq baǵdarlamasyn toqtatyp, esesine Iranǵa salynǵan halyqaralyq sanktsiialardy joiý qarastyrylǵan.
Donald Tramp buǵan deiin eger kelisim ózgertilmese, Vashingtonnyń odan shyǵatyny týraly birneshe ret eskertken. Biraq Tegeran AQSh birneshe el qatysqan kelisimnen shyqsa Iran iadrolyq baǵdarlamasyn qaita bastaýy múmkin ekenin málimdegen.
Frantsiiamen qatar Germaniia da kelisimdi buzbaý keregin aitqan. 23 sáýirde Torontoda "Úlken jetilik" elderi syrtqy ister ministrleriniń kezdesýinde sóilegen Germaniia syrtqy ister ministri Haiko Maas ta kelisimnen shyqpaý qajetin málimdedi.
25 sáýirde Emmanýel Makron AQSh Kongresinde sóileidi.
