AQSh prezidenti Donald Tramp biýdjettik daǵdarysqa bailanysty Davosta ótetin Dúniejúzilik ekonomikalyq forýmǵa (DEF) amerikalyq delegatsiiany jibermedi. Bul týraly Aq úidiń baspasóz hatshysy Sara Sonders taratqan habarlamada aitylǵan.
«800 myń amerikalyq qyzmetkerdiń jalaqasyn ala almai otyrǵanyna bailanysty, sondai-aq komandasynyń jumysyn tiisti dárejede qamtamasyz etý maqsatynda Tramp óz delegatsiiasyn Shveitsariianyń Davos qalasynda ótetin Dúniejúzilik ekonomikalyq forýmǵa (DEF) jibermeidi», - dedi ol.
Basynda DEF-qa AQSh delegatsiiasyn Tramp ózi bastap baratyndai bolǵan. Biraq 10 qańtarda ol Twitter-de bul sapardy Aq úi men AQSh Kongresiniń amerika-meksikalyq shekaradaǵy baqylaýdy kúsheitý týraly talasynan keiin boldyrmaitynyn jazǵan.
Keiin amerikalyq ákimshiliktiń eki ókili delegatsiiany qarjy ministri Stiven Mnýchin jáne AQSh memlekettik hatshysy Maikl Pompeo bastap baratynyn habarlady.
Ótken jyldyń 22 jeltoqsanynan beri AQSh-ta biýdjette qarajattyń bolmaýyna bailanysty federaldy úkimettiń jumysy ishinara toqtatylǵan. Bul - respýblikalyqtar men demokrattardyń Kongreste biýdjet parametrlerin kelise almaýynan bastaý alǵan daý. Tramp pen onyń partiialas jaqtastary Meksika men shekarada qamal turǵyzýǵa aqsha bólýdi biýdjettiń shyǵyndaryna qosqysy keledi.
Demokrattar federaldy qazynadan bul maqsatqa aqsha bólýdi eshqashan qoldamaitynyn habarlap otyr. Tramptyń ákimshiligi bul maqsatqa biýdjetten 5,7 mldr dollardy talap etken-tin.
