Máskeýde qazaqstandyq stýdent Tomiris Baisafanyń ólimine qatysty is boiynsha sot talqylaýy ótip jatyr. Marqumnyń anasy Janna Ahmetova sot otyrystarynyń egjei-tegjeiin aityp berdi, - dep habarlaidy Tengrinews.kz.
"Sot ótip jatqanyna úshinshi apta boldy. Ol kún saiyn ótkiziledi. Ashyǵyn aitsam, bári óte qiyn. Qarapaiym sot pen alqabiler arasynda úlken aiyrmashylyq bar. Alqabiler otyrysynda sot materialdaryn aitýǵa bolmaidy. Onda kim oqiǵany basynan bastap, senimdi qylyp aityp beredi sol jeńedi. Qarapaiym sot otyrys bolsa ol baiaǵyda sottalyp keter edi. Medjidov sony túsindi de alqabiler sotyn tańdady", - dep jazdy marqumnyń anasy Janna Ahmetova Instagram-paraqshasynda.
Janna Ahmetovanyń aitýynsha, aiyptalýshy tarap "múmkindiginshe jaǵdaidan shyǵýǵa tyrysyp jatyr".
"Medjidovtyń dostary bir aýyzdan Tomiris úsh ret ózin-ózi óltirgisi kelgenin, sondai-aq keide belgisiz dári-dármek qoldanatyn nashaqor ekenin aitty. Olarǵa buny Medjidovtyń ózi aitqan. Al "qazaqtar qoǵamdastyǵy ony osyǵan bola shyǵaryp jibergen". Biraq olardyń birde-bireýi mundai oqiǵa bolǵanynan habarsyz. Sottalýshynyń dosy kýáger B., advokattar atynan Tomiristiń synyptastaryna hat jazyp, kýálik berýdi suraidy. Advokattardan!" - dep jazady Janna Ahmetova.
Tomiristiń anasynyń aitýynsha, Medjidovtyń ózi tergeý barysynda oqiǵanyń úsh nusqasyn aitqan. Biraq olar tergeýde rastalmaǵan.
"Birinshisi, ol bir qadam jasap, qulap ketken. Ekinshisi, ony iterip jiberip, sekirip ketken. Olai bolýy múmkin emes. Terezeniń aldy keń onda jai qulap ketý múmkin emes, al ózi sekirse eshteńege timeýi kerek bolǵan. Úshinshi nusqa boiynsha, ol qulaǵan kezde Tomiristiń kózin kórgen... Ony kórý úshin ol terezede turýy kerek... Tomiriske jetý úshin oǵan kem degende úsh sekýnd qajet, al qulaýdyń ózi 1,7 sekýndqa sozylǵan. Ol tek tereze aldynda tursa ǵana kórýi múmkin edi", - dedi Janna Ahmetova.
Marqumnyń anasy "qulaý kezinde qosymsha údeý berilgen, iaǵni ony bóten adam iterip jiberdi" dep qosty.
"Erteń jaryssóz. Juma kúni alqabiler óz úkimderin shyǵarýy múmkin. Men kúnde tozaqtan shyqqandai bolamyn. Eshkimniń basyna bermesin", - dep qosty ol.
Eske salaiyq, buǵan deiin 2018 jyly 3 mamyrda MGIMO terezesinen qulap ketken qazaqstandyq stýdent Tomiris Baisafa Máskeý aýrýhanasynda qaitys bolǵany habarlanǵan edi.
