Toida bilep, óner kórsetken er adam Jeli qoldanýshylaryn tánti etti, - dep habarlaidy Tengrinews.kz tilshisi.
Videodaǵy er adam - Almaty turǵyny Muhtar Aitbektegi esimdi azamat bolyp shyqty. Jasy 46-da. Jeli qoldanýshylary ony ánshi Dastan Orazbekovke uqsatqan.
"Kóńilin kóterip bilegende turǵan eshteńesi joq, jarasyp tur", "Biraz jasqa kelip, osylai qimyl jasap tur, dym da ersi emes, qyzyǵyp otyrmyn", "Dastan Orazbekovke uqsattym, jaraisyz", - deidi Jeli qoldanýshylary.
Muhtar Aitbekteginiń aitýynsha, Jelide taraǵan video Qapshaǵaida týystarynyń biriniń toiynda túsirilgen.
"Bul video Qapshaǵai qalasynda jeńgemniń 50 jyldyq mereitoiynda túsirilgen. Sol toiǵa ata-anamdy aparǵam. Keiin aǵa-jeńgem "bir bilep bershi" dep qolqa saldy, kóńilderin qaldyrmaiyn dep bilep berdim. Biraq Jelige kim salǵanyn bilmeimin", - dedi ol.
Muhtar bidi jaqsy kóretini sonshalyq, kez kelgen áýenge bilei beretinin aitty.
"Jas kezde aýylda júrgende "KAR-MEN" toby men Maikl Djekson kýmirim boldy. Shynymdy aitsam, bidi qatty jaqsy kórem, kez kelgen mýzykaǵa bilei berem. Yrǵaqty ustasań boldy, bi ózi shyǵa beredi. Tarazda 18 jasymda bige eliktedim, keiin áskeri ómirge bet burdym. 2 ai ǵana bige qatystym", - dedi ol.
Muhtardyń aitýynsha, kásibi túrde bimen ainalysyp kórmegen. Ózin Dastan Orazbekovke uqsatqan jeli qoldanýshylaryna onyń óneri unaitynyn, biraq eliktemegenin aitty.
"Bi degen sporttyń bir túri deýge de bolady. Biler aldynda deneni qyzdyryp, jattyǵyp alý kerek. Bileseń kóńiliń de kóteriledi ǵoi. Dastan inimizdiń bii unaidy. Óte keremet qimyldar isteidi", - dedi ol.
Muhtar - Ulttyq ulannyń zeinetkeri. 22 jyl osy salada qyzmet etken. Onyń bige degen qyzyǵýshylyǵy KVN oinaǵan kezinde de kóringen.
"KVN oinadym. 1998 jyly Almatyda joǵary bilim beretin institýttarmen oinap, Ishki ásker komandasy bolyp 1 oryn aldyq. Qoiylym kezinde bi jaǵy menen bolatyn", - dep kúlip eske aldy ol.
