QR Premer-Ministriniń orynbasary Eraly Toǵjanov koronavirýstyń órshýine bailanysty toi-jiyndy, otbasylyq merekelerdi, negizsiz bas qosý men qydyrýdy ýaqytsha toqtatýǵa shaqyrdy, dep habarlaidy QazAqparat.
«Qurmetti azamattar! Búginde eldegi qoǵamdyq-saiasi jaǵdai turaqtaldy. Qalpyna keltirý jumystary júrip jatyr. Alaida koronavirýs indeti órship barady. Sondyqtan maska kiiý, áleýmettik qashyqtyqty saqtaý jáne t. b. aldyn alý sharalaryn qoldaný qajet. Toidy, jiyndy, otbasylyq merekelerdi, negizsiz bas qosýdy, qydyrýdy ýaqytsha toqtatý kerek. Aýrý adamdar oqshaýlaný kerek. Bul – búgingi kúnniń, búgingi jaǵdaidyń talaby. Bul – ainaladaǵy siz jaqsy kóretin adamdarǵa qaýip tóndirmeýdiń joly! Bul – jalpy sanaly qoǵamnyń ár azamatynyń moinyna alatyn jaýapkershiligi», - dedi Toǵjanov Ortalyq kommýnikatsiialar qyzmetinde.
Premer-Ministr orynbasary sanaly qoǵamnyń jaýapty adamdardan quralatynyn atap ótti. Áleýmettik jaýapkershilikke ákeletin qoǵamdyq sana, sanaly qoǵam qalyptastyrýǵa ár azamat óz úlesin qosýy kerek.
«Aýyryp em izdegenshe, aýyrmaityn jol izdeiik, aǵaiyn! Osy rette Úkimet tarapynan biznes sýbektileriniń jumysyna kedergi kelmeýi úshin barynsha sharalar qabyldanyp otyr. Sondyqtan Ashyq jobasyn sizder men bizderdiń amandyǵymyz, saýlyǵymyz úshin ári qarai damyta berýimiz kerek. Barlyq qoldanylyp jatqan sharalar halqymyzdyń densaýlyǵyn qorǵaýǵa baǵyttalǵanyn taǵy da atap ótemin. Bizdiń baqytymyzdyń onnan toǵyzy densaýlyǵymyzǵa bailanysty. Sondyqtan, qurmetti qazaqstandyqtar, sizderge jáne jaqyndaryńyzǵa densaýlyq tileimin», - dedi Toǵjanov.
