Ánshi, kompozitor, Qazaqstannyń Halyq ártisi Altynbek Qorazbaev Qazaqstan halqyn Jańa jyl merekesinde karantin talaptaryn saqtaýǵa shaqyryp, pikir bildirdi, dep habarlaidy "Ult aqparat".
«Mereke qarsańynda turmyz. Sondyqtan barsha qazaqstandyqtardy saqtyq sharalaryn qatań túrde saqtaýǵa shaqyramyn. Kórshiles Resei elinde barlyq sharalardy ótkizýge tyiym saldy. Bizde de karantin kúsheiip keledi. Halqymyz aman bolsa, áli talai toiǵa barady, merekeni atap ótedi. Aldymyzda qazaq halqynyń jańa jyly - Naýryz merekesi kele jatyr. Ol ýaqytqa deiin indettiń beti qaityp, jaǵdai jaqsarady degen úlken úmit bar. Toi toilaýǵa asyqpaiyq. Tártipke baǵynyp, aq halatty abzal jandardyń kúndelikti aityp jatqan saqtyq sharalary týraly aqyl-keńesine nazar salaiyq», - dedi Altynbek Qorazbaev.
Qazaqstannyń Halyq ártisi qazaq halqyn Jańa jyl merekesimen quttyqtap, keler jyly ár otbasyǵa tabys pen birlik tiledi.
