QR Parlamenti Senatynda «Qazaqstan Respýblikasynyń keibir zańnamalyq aktilerine tótenshe jaǵdai máseleleri boiynsha ózgerister men tolyqtyrýlar engizý týraly» QR Zań jobasy qabyldandy, – dep habarlaidy QazAqparat.
«Zań jobasy Memleket basshysynyń «Áleýmettik-ekonomikalyq turaqtylyqpen qamtamasyz etý sharalary týraly» Jarlyǵyn oryndaý maqsatynda ázirlengen. Zańnyń maqsaty - tótenshe jaǵdai kezeńinde áleýmettik-ekonomikalyq turaqtylyqpen qamtamasyz etý úshin jedel sharalar qabyldaý múmkindigi», - dedi QR Ulttyq ekonomika ministri Rýslan Dálenov Senattyń plenarlyq otyrysynda.
Onyń aitýynsha, zań jobasy tótenshe jaǵdai kezeńindegi memlekettik basqarýdyń jumys isteý mehanizmin anyqtaidy. Ol úshin «Tótenshe jaǵdai týraly» jáne «Quqyqtyq aktiler týraly» zańdarǵa túzetýler engiziledi.
Atap aitqanda, «Tótenshe jaǵdai týraly» zań TJ kezeńindegi zańnamanyń jekelegen salalarynyń is-áreketiniń ereksheligimen tolyqtyrylady. Zań jobasy arqyly búl tizimde 14 sala qamtylǵan: - salyq, biýdjet, keden, bank, eńbek týraly jáne monopoliiaǵa qarsy zańnamalar; - densaýlyq, memlekettik satyp alýlar, valiýtalyq retteý týraly zańnamalar; - áleýmettik qorǵaý, memlekettik múlik jine memlekettik baqylaý men qadaǵalaý salalaryndaǵy zańnama; - eldiń halyqaralyq mindettemelerin júzege asyrý zańnamasy.
«Tótenshe jaǵdai kezinde qabyldanǵan quqyqtyq aktiler onyń merzimi bitkenshe jumys isteidi. Bul talap arnaiy merzim belgilengen aktilerge júrmeidi.
«Quqyqtyq aktiler týraly» zańǵa normativtik quqyqtyq aktiniń nemese onyń jekelegen normalary áreketiniń «Tótenshe jaǵdai týraly» zań tártibimen toqtatylatyny týraly túzetý usynyldy. Jalpy, kórsetilgen túzetýler tótenshe jaǵdai kezeńinde áleýmettik-ekonomikalyq turaqtylyqpen qamtamasyz etýge baǵyttalǵan», - dedi Rýslan Dálenov.
